Standly enkawl Aizawl FC an vul

Aizawl FC-in Mizoram Police an hneh loh hnuah an tho lehnghal a, Inrinni zan khan MPL kaithar FC Venghnuai chu 5-1 zetin an sawp.

I League club hian zanin dar 7:00 hian Chhinga Veng FC an hmachhawn dawn a, Chhingcows tan semifinal ticket nei turin point hmuh a ṭul ang.

Standly Rosario hnuaiah Aizawl FC an inrem dik chho zel a, I Day Football-a an inlan hmasak ber nen an inthlau ta hle. Kumin inelna an neih hmasak berah AFC hian semifinal-ah MPL kaithar FC Venghnuai an hneh lo a, Inrinni zanah erawh 5-1 in an sawp.

I League club hian kawng tin rengin inkhel an thunun a, Lalhriatrenga'n (Achia) freekick aṭangin minute 20-na lekah a khung. Chanmari tlangval Achia hian freekick aṭangin goal a khung meuh lo a, goal a khung takah chuan Aizawl FC 'puja' a fuh dawn tih a hriat nghal.

AFC rawlthar pahnih Rochharzela leh F. Lalremsanga ten first half-ah an khung belh. I Day Football-ah penalty hmangin FC Venghnuai an hneh lo a, MPL-ah Remsanga leh Richard Kassaga ten penalty an hlah tawh bawk avangin Standly tan Rochhara penalty hi thawk huaina tham a tling ngei ang.

Second half-ah Isak Vanlalruatfela'n AFC goal lina a khung a, FC Venghnuai tan Thangzawmsanga'n mualpho hliah khuhna khung ve bawk se hun tawp hma hretin Venghnuai player Lalruatsanga'n an lamah a tilut. Goal hnuhnung ber hi substitute William Lalnunfela thawhrah aṭanga lut a ni.

Aizawl FC-in November 30, Inrinni hian Mohun Bagan an mikhual dawn a, hei vang hian MPL match ṭhenkhat sik sawi a ṭul. Standly hoten round 14-a Chhinga Veng an hmachhawn tur chu zanin hian sawn hma a ni a, inkhel pawimawh a la ni pha.

I League club hian Chhingcows hi an hneh chuan match khat khelh hmabak awm chungin hmahruaitu an ni dawn a, Chhinga Veng tan pawh semifinal lut chiang turin chak a la ṭul. Chutihrualin Lalremruata leh Anand Gurung-a hote hian point hmu tawh lo pawh ni se semifinal luh theih dan a awm bawk.