Electric Veng an chesual nawn

Electric Vengin point ruk hmuh theihna tura an ngaih Chawnpui FC leh Ramhlun North lak aṭangin point khat chiah an hlawh chhuak a, semifinal beiseina erawh an la nei chhunzawm zel.

Inrinni tlai khan Electric Veng hian Kolasib-a 4-0 ngawta an sawp Ramhlun North an hmachhawn a, goal awm loa inhnehtawkin point khatah an lungawi a ṭul.

Lammualah Electric Vengin inkhel an thunun a, chance ṭha bik pawh ṭum hnih an nei. First half-ah captain Vanlal-remkima (Tetea) ball pass ṭha zet chu David Lalchhuanawma'n chang fuh mah se Salem Veng tlangval hian Ramhlun North keeper Eddie Zorammawia a paltlang thei lo.

Hun tawp hma hretin tawnhriat nei ṭha Lalrammawia ball cross ṭha zet chu Tetea'n a hlah thung. Ramhlun North tan Lalmawizuala (Ashtea) a ṭangkai leh a, Bethlehem Vengthlang tlangval hi man of the match-a thlan a ni.

Ramhlun North-in point khat an hmuh avangin table mawngphaha awm Chawnpui aiin point khatin an hmu tam a, Mizoram Police leh Chanmari FC an la hmachhawn dawn. An elpui Chawnpui hi FC Venghnuai leh Mizoram Police te nen an la inkhel dawn a, dinhmun ṭha zawk hriatthiam a har hle.

Semifinal khelh tum Electric Veng hmaah Chhinga Veng FC leh FC Venghnuai te an la awm a, Chanmari FC-in Aizawl FC leh Ramhlun North an la hmachhawn dawn. Team pahnih hi point inang hmua season an khar a nih chuan head to head-a ṭha zawk Electric Vengin semifinal an lut ang.