2020-21 season-ah MPL awm dawn lo

Mizoram Football Association chuan nimin khan Executive Committee Meeting an nei a, 2020-21 season-ah Mizoram Premier League khelh a nih loh tur thu an tichiang. 

Mizoram chhunga football inelna sang ber MPL awm loh chhan tur hi Covid-19 vang a ni a, MFA chuan 2021-22 season-ah inelna ṭha taka buatsaih theih an inbeisei.

MPL season hnuhnung ber chu September 5 leh December 14, 2019 chhung khan khelh a ni a, final-ah Aizawl FC-in Electric Veng FC 2-0 a hnehin an champion.

Amaherawhchu MFA hnuaia inelna dang erawh Covid-19 vangin khelh theih a ni lo. May 30, 2020-a Office Bearer’s meeting chuan coronavirus vangin 2019-2020 season-a MFA calendar titawp turin thutlukna an siam.

Inelna khelh ṭhulh langsar zualte chu MFA Cup (Saitual-a nghah tur), Inter District MFA Sub Junior Boys C'ship (Mamit DFA thlen tur), Inter District Women's C'ship (Siaha DFA thlen tur), MFA Women's League leh MFA Futsal League a ni.

Aizawl DFA hnuaia khelh NECS Cup pawh khelh chhunzawm beiseiin ti tawp lawk lo mah se Covid-19 vangin khelh theih a ni ta chuang lo. Inelna la dam zawng chu ADFA hian entry fee an pe let.

Coronavirus vangin 2019-2020 season tawp lam khelh zui theih a ni lo a, amaherawhchu hripui hian 2020-21 a nghawng nasa lehzual.

MFA chuan thil awm dan an thlir a, July 6, 2020-a Executive Committee meeting chuan MFA Super Cup leh Independence Day Football Tournament te kaltlangpui a nih loh tur thu an tichiang. Heng bakah hian Mizoram Premier League chu kum 2020 (July - December) chhung chuan khelh loh phawt ni se, tiin an rel.

Covid-19 boruak a zirin MPL hi season chawhnu lam kum 2021 (January - May) thla chhunga khelh theih beisei a ni a, amaherawhchu beisei aia boruak a ṭhat chak loh avangin nimina MFA Executive Committee chuan 2020-2021 season-a MPL kalpui a nih dawn loh thu an tichiang.

MFA Executive Committee chuan a hnuaia tarlan ang hian thuchhuah an siam.

Mizoram Football Association chuan Mizoram Premier League chu 2020-2021 season atan a kalpui dâwn lo.

MFA Executive Committee chuan Covid-19 avanga harsatna awm mek thlir chungin MPL kalpui zel dan tur chungchangah MPL Club-te nen inrawn khawmna neih ni se, tiin a rel a. January 19,2021-ah MFA aiawhte leh MPL Club aiawhte chuan MPL kal zel dan tur an ngaihtuah a, 2020-2021 season atan chuan kalpui loh mai ni se, tiin a rel.

He inrawn khawmnaah hian MPL kalpui theih dan leh harsatna awm theite ngaihtuah a ni a, tun season hi May, 2021-ah a tawp mai tawh dâwn avangin hun a awm tawh loah ngaih a ni a, Covid-19 avangin MPL club lamin harsatna an tawhte sawi chhuah a ni.

Training leh league kalpui tak tak turin sorkarin Covid-19 chungchanga inkaihhruaina a siam (SOP) chu zawm famkim a harsat tur thu sawi chhuah a ni a, player leh official-te hriselna leh himna ngaihtuah a ṭul thu sawi a nih bakah MPL inelna chu hun chêp tak kara kalpui lo a, hri lêng a ziaawm huna 2021-2022 season-ah ṭha zawka kalpui turin an rel ta a ni.

Edition    Season    Champion

1st    2012–13    Dinthar FC

2nd    2013–14    Chanmari FC

3rd    2014–15    Aizawl FC

4th    2015–16    Aizawl FC

5th    2016–17    Chanmari FC

6th    2017–18    Chhinga Veng FC

7th    2018–19    Aizawl FC

8th    2019-20    Aizawl FC

        2020-21    Inelna ṭhulh