The Gabba-ah India-in hnehna an chang

Australia khawpui pakhat Brisbane-a cricket khelmual 'The Gabba'-ah mikhual team-in kum 1988 aṭang khan hnehna an chang tawh lo. Nimin khan India-in Aussies hi an buzawlah an hneh a, kum 32 hnuah Men in Blue-in 'The Gabba' an luhchhuah a, Australia-ah series 2-1 in an la.

Ṭhumvawrah Australia an vannei zawk a, vuak hmasak an thlang. Aussies hian run 369 leh 294 an siam a, India tan target-ah run 328 an chhawpsak. India hian first innings-ah run 336 siam mah se cricket expert-ten target hi umphak theihah an ngai lo.

India tan Shubman Gill (91) leh Cheteshwar Pujara (56) te an che ṭhat avangin draw theihna kawng a inhawng a, amaherawhchu draw ni loin hnehna chan chu an tum zawk a ni. Kum 23 mi Rishabh Pant-a'n thi loin run 89 a siam a, India hnehna a chanpui.

Bollywood kutchhuak film-ah chuan a changtupate awihawm loh khawpin an che ṭha hret ṭhin a, tun ṭuma India chak dan pawh hi Bollywood film nena khaikhin theh a ni.

India hian Test match hmasa berah captain chhuanvawr Virat Kohli hoin Adelaide-ah an mualpho a, first innings-ah run 244 chauh an siam hnuin second innings-ah run 36 chauh an siam. Wicket riatin Australia an chak a, ni thumna lekah hnehna an chang.

Captain Kohli-a'n fa a neih dawn avangin mualpho taka chak lo India a haw san a, Test match vawi li  khelh tur a nih avangin India chu 4-0 a chak lo turah a ngai. Ajinkya Rahane kutah mawhphurhna a tla a, Mumbai tlangval hoin Melbourne-a Second Test khelhah hnehna an chang.

Sydney-ah third Test khelh a ni a, an inhnehtawk avangin cricket ngainatuten Brisbane an thlir ṭhup. The Gabba boruak ringawt pawh hi zamna tham a tling a, India tana harsatna belhchhah turin Jasprit Bumrah, Mohammed Shami, Ravichandran Ashwin leh Ravindra Jadeja te an inhliam.

Cricket khawvel awp ṭhintu Australia-in chakna tur a nih chuan khelmualah ṭawngkam hriam hman an hreh lo a, India hmabak a thim. The Gabba-ah India tana result ṭha ber chu 'draw'-ah a ngaih theih a, amaherawhchu Men in Blue hian an hmaa harsatna awm zawng zawng su kiangin hnehna an chang.

Cricket khawvelah chuan India bawkin chanchin ngaihnawm an nei leh ṭhin a, India hian chak turin run 328 an mamawh. Kum hnih liam ta khan India hian Australia-ah series an la a, Asia ram aṭanga series la hmasa ber a ni.

Hemi a nih avang hian India tan Border-Gavaskar Trophy kawl chhunzawm turin draw chiah an mamawh. Australia hian bowler ṭha Pat Cummins, Josh Hazlewood leh Mitchell Starc te an kawl avangin chak an inbeisei a, amaherawhchu India-in Cheteshwar Pujara an kawl.

Kum 32 mi Pujara hian ball 211 zet a hmachhawn a, run 56 a siam a, test cricket hriatthiam chin chuan a hnathawh hlutzia an man thiam ang. Pujara hian 'ball thar' chu a lo dang chul a, batsman dangin an vuak theih phah. Aussie bowler-te an vawm na bawk a, ball-in Pujara fuh ṭhin avangin ṭum thum zet physio pawh an tlan lut.

India hian chak an tum tih an khelh dan hmangin an lantir a, paruknaa lut tur Rishabh Pant chu panganaah an luhtir. Pant hian ball 138 aṭangin thi loin run 89 a siam a, man of the match-ah an thlang. Uttarakhand-a piang Pant chuan, "Ka hun tawna ropui ber a ni," tiin a sawi.

India-in hnehna an chang chiah a, cricket star lar Sachin Tendulkar aṭanga prime minister Narendra Modi thlengin an ṭawng chhuak.

BCCI president Sourav Ganguly chuan, "Australia ramah harsatna tam tak paltlangin series kan la a, a ropui takzet. India cricket history-ah kan hre reng tawh ang. BCCI chuan India team lawmpui nan nuai 500 a pe ang. An hnehna chan hlut zia hi thua sawifiah chi a ni lo," tiin a sawi.

England captain hlui Michael Vaughan chuan, "Test series-a hnehna chan dan ropui ber a ni. India ka lawmpui a che. Kumin kum tawp lama Ashes khelh turah England tan fuihna ṭha tak a ni ang," tiin a sawi.

India-in hnehna an chan nemngheh nan Rishabh Pant-a'n Josh Hazlewood-a chu four a vuaksak a, kum 23 mi hian boundary a vua tih a hre chiah tihin a kut a hum ruh a, boruak a hnek. Nimina Australia rama thil thleng hi cricket history-ah theihngilh a ni tawh lo ang.