Aizawl FC coach thar Yan Law

Aizawl FC chuan nimin khan head coach Standly Rozario thlak nan Yan Cheng Law an lakluh fel thu an puang. Mizo club hian vawiin tlai dar 2:00 hian Jadavpur Stadium-ah Gokulam Kerala an hmachhawn dawn a, assistant coach Gosen Rammawia hoin an khel ang. 

Law hi Indian Professional coach naupang ber a ni a, kum 25 mi chauh a nihin AFC ‘A’ license a nei. India ram club lian Minerva Punjab FC leh Mohammedan FC te a enkawl tawh a, Covid-19 vangin Law hi khung hrang a la ngai dawn. 

Kolkata-a piang Law hi football-ah talent ṭha tak a nei a, school a kal laiin Calcutta Football League-a first division club-in an la tawh. West Bengal youth team tan a khel tawh a, India Under 19 camp thlengin a awm.

CFL-a team ṭha ber zinga mi George Telegraph-in an la a, hmabak a nei êng hle. Amaherawhchu club official zinga mi Joydeep Mukherjee chuan coach ni turin theihna a nei tih a hria a, coaching lama kal turin thurawn a pe.

Kum 20 mi chauh a nihin Law hian Mukherjee-a club thar din Calcutta United a enkawl ṭan a, hemi hnu hian Minerva Punjab, Mohammedan SC leh Techtro Swades United FC te a enkawl leh tawh.

Law chuan, "Club sulhnu nei ṭha tak Aizawl FC ka enkawl thei hi ka inchhuang hle a ni," tiin Vanglaini a hrilh. Amaherawhchu Covid-19 vanga inkhunghran bakah vawi li RT-PCR hmanga test a ngaih avangin Law hian Aizawl FC-in January 24, Pathiannia Indian Arrows an hmachhawn hunah pawh Mizo club hi a enkawl hman a rinawm loh.

Aizawl FC-in head coach atan Standly Rozario hmang chungin Lalsangzuala Hmar hoin training an nei a, inelna hmachhawn turin an inbuatsaih ṭha hle. Mahse Kolkata an thlen hnuah coach Sanga'n Covid-19 a kai tih hriatchhuah a ni a, test nawn hnuah pawh a la negative loh avangin Mizo club thuneituten coach thar la turin thutlukna an siam ta a ni.

Gokulam Kerala nen hian Gosen Rammawia hoin an khel dawn a, an match hmasa bera Roundglass Punjab an hneh loh avangin Mizo club tan point hmuh ngei a ṭul. Harsatna belhchhah turin winger pawimawh Brandon VL Remdika leh Lalmuanzova te chu inhliam vangin an inlan theih a rinawm lo a, chhungkaw chhiat tawhna avangin H. Lalmuankima'n bul a ṭan theih a rinawm lo bawk.

Chutihrualin Aizawl FC tana thu lawmawm erawh quarantine lai an awm tawh lo a, coach Gosen-a'n Roundglass Punjab an hneh loh ṭum aiin player thlan tur a ngah tawh zawk ang. Mizo club khingpui tur Gokulam hian an match hnuhnung berah Punjab 4-3 in an hneh thung.

Kerala club-in hnehna an chan ṭum hian striker pahnih Denny Antwi leh Philip Adjah te an khel ṭha a, Mizo tlangval Lalromawia'n bul a ṭan bakah bench aṭanga lut Shillong Lajong star hlui Zodingliana Ralte (Adinga) a khel ṭha takzet.

Aizawl FC    02:00 PM    Gokulam Kerala

Indian Arrows    07:00 PM    Neroca