Duhsak bik an nei lo

Australian Open khel tura player zin lut zingah duhsakna dawng bik an awm lo. Victorian sorkar hotupa Daniel Andrews chuan player langsar leh tenau zawkte pawh ang khat veka enkawlna an pek thu a sawi.

Coronavirus vangin infiamna khawvel a la buai. February 8 aṭanga khelh tur Australian Open a inlan tur player-te chu Melbourne-ah an zin lut tawh a, ni 14 chhung khunghran vek tur an ni.

Melbourne khawpui awmna Victoria sorkar hotu Andrews chuan, "Natna hrik hian thlei bik a nei lo a, chuvangin keini pawhin ang khat vekin kan en a ngai. Player ṭhenkhat chuan ni 14 khunghran nih kher hi a ngai an ti lo.

"Amaherawhchu a ṭhen khung hran a, a ṭhen dah zalen ngawt kha a dik lo. Chuvangin kan zavaia hrilselna leh him zawk nan inkaihhruaina chi khat kan neih kha fuh berah kan ngai a ni," tiin a sawi.

Player leh coaching staff zingah hri kai an awm a, heng mite hi dah hran bik an ni leh bawk. Hri kai lote chuan khung hran an nih chhung hian training an nei thei dawn a, player ṭhenkhat zingah mahni chenna 'room' chhunga ball vua pawh hmuh tur an awm hial!

Kumin Australian Open-ah hian champion lai Novak Djokovic leh Rafael Nadal an inlan dawn a, anni pahnih bakah hian Dominic Thiem chu champion tura rinkai langsar a ni. Roger Federer erawh a inlan thei dawn lo, number 1 hlui Andy Murray pawh a dinhmun a la chiang lo.