Mizoram cricket team chak lo

Board of Control for Cricket in India (BCCI) hnuaia inelna Syed Mushtaq Ali Trophy 2021 khelh laiah nimin khan Mizoram chuan an match hnuhnung ber an khel a, plate group inkhelah Mizoram team hi Bihar lakah wicket rukin an tlawm.

Chennia a inelna neihah Bihar chu ṭhum vawra vannei zawk niin vawm hmasak an thlang. Mizoram lamin over 20 chhunga run 83 siamin wicket riat an hloh. Mizoram tan Lalhruaizela chuan ball 36 a hmachhawn aṭangin run 21 a vaw chhuak.

Bihar tan target a sang lo, over 14.4 lekah an lehpel - wicket li chauh an hloh. Plate group-ah Bihar hian match li an khelhah hnehna an chang vek a, group hmahtuaitu niin knockout round an lut.

Chak lo Mizoram tan lawmna tur pakhat a awm. G. Lalbiakvela, Zothanchhunga Hmar, Bobby Zothansanga leh Lalhruaizela te chuan wicket khat ṭheuh an la, an tum ram thleng zo lo mah se hriatreng tur sulhnu an hnutchhiah.

Mizoram leh Arunachal Pradesh ten match li aṭangin chak ni hmel an hmu ve lo, season hmasa khan Mizoram team hian hneh nei loin inelna an lo hmachhawn tluan tawh bawk.