Ibra hoin Milan an chungnung

Zlatan Ibrahimovic goal hnih hmangin AC Milan chuan an mikhualna ramah Cagliari 2-0 in an hneh a, Serie A match 18 aṭanga point 43 hmuin table chung berah an awm - anmahni hnaih bertu Inter Milan aiin point thumin an sang zawk.

Kar tawp inkhelah Inter hian champion lai Juventus hnehin Milan hi an nihrual hman. Mahse match khelh zat inangah Milan an chungnung leh ta zawk a, season kua zet Old Lady rorel tawhna chu a nghing mek zel.

Thawhṭan zan inkhelah Ibrahimovic chuan minute sarihna lekah ama penalty hlawh chhuah khungin bul a ṭan fuh hle, defender Davide Calabria-a'n ban a pet per bawk - chawlhlawk hmain goal dang a lut chhunzawm tawh lo thung.

Second half-ah pawh Ibra bawk a langsar, Swede striker hian through ball a hmuh chu box chhunga luhpuiin an goal hnih nan a hlap lut pawp; hattrick a siam theihna turah erawh keeper Alessio Cragno a paltlang thei tawh lo.

Cagliari lamin Giovanni Simeone hmangin hun ṭha nei mah se keeper Gianluigi Donnarumma fakna mai a ni a, minute 74-naah Milan midfielder Alexis Saelemaekers chu yellow card pahnihna vanga hnawh chhuah niin, player tam zawkin an tamna an chhawr thei ta chuang lo a ni.

Kum 39 mi a ni tawh a, kumin October 3 hian kum 40 mi a ni tawh dawn. Mahse khelmual chhungah erawh Ibrahimovic a la chuai lo, khawvel striker hriam leh hlauhawm zingah a la tel phak reng.

Ibra hian tun season league match 13 a khelh aṭangin goal 13 a khung tawh. Coronavirus leh hliam vangin match ṭhenkhat a khel thei lo a, a dam a nih phawt chuan Milan tan tlarhma lama player pawimawh a ni phak zel.

Milan hian Ibra ang bawka senior player Mario Mandzukic an lalut dawn. Kum 34 mi striker hian tlarhma lamah Ibra nen khelhna hmun an inchuh ang. Ibrahimovic chuan Mandzukic an nei thei chu a lawmawm a tih thu a sawi a, "Khingpuiten ven tur an ngah sawt dawn," a ti.

Hnehna an chan hnuah Milan coach Stefano Pioli chuan a naute a fak a, season tluang taka an hman vanga a lawm bakah Cagliari laka chak phu taka an khel chhuak chuan a tih lawm thu a sawi tel bawk.

Pioli chuan, "Season kan hman laia kan kal dan pangngain kan kal zel, nuamti leh hnehna chan duhna thinlung nen khelmual kan lut ṭhin. Player ten fans lam lawmna turin an theihtawp an chhuah chhunzawm zel ang," a ti.

Season hmasa khan Milan hian Pioli ban an tum hman hial, mahse season chawhnu lamah harhtharna a chan pui. Kuminah pawh an harhna hi an chhawm zel a, an elpui Juventus leh Inter Milan chungah an awm - league match 18 aṭangin vawi khat chauh an la tlawm.