Sindhu leh Srikanth an chak

Nimin aṭang khan Toyota Thailand Open Super 1000 tournament khelh ṭan a ni a, Indian player PV Sindhu leh Kidambi Srikanth te chuan an match hmasa berah harsatna nei loin hnehna an chang.

World champion Sindhu-i'n a khingpui world number 12 Busanan chu 21-17, 21-13 in a hneh. Kar hmasa khan Yonex Thailand Open lamah beisei phak lo mah se tun ṭumah chuan beiseina a nei sang ta deuh.

Rio Olympic silver medalist Sindhu chuan, "Kar hmasa khan hneh nei loin ka tla, tun ṭumah erawh ṭha taka ka khelh avangin hnehna ka chang ve ta," a ti. Busanan nen hian vawi 12 an intawng tawh a, Sindhu zawkin vawi 11 ngawt hnehna a chang tawh a ni.

Tokyo Olympic khel tura tling tawh Sindhu hian a match lehpekah chuan Korean player Sung Ji Hyun leh Soniia Cheah inkhela chak zawk a hmachhawn leh ang.

Mipa singles lamah Srikanth chuan Thai player Sitthikom Thammasin 21-11, 21-11 in a hneh, world number 1 hlui hian hnehna chang turin minute 37 bak hun a mamawh lo hial.

Kar hmasa khan Yonex Thailand Open-ah Srikanth hi a inlan a, match hmasa berah hnehna chang mah se hliam vangin a inhnukdawk - tunah erawh a hliam a dam tawh.