Drinkwater-a'n a tui tlanna a thlak

Chelsea midfielder Danny Drinkwater chuan season tawp thleng loan-a khel turin Turkish Super Lig club Kasimpasa a zawm a, kum 30 mi midfielder hi Chelsea tan kum hnih leh a chanve dawn chu a inlan tawh lo!

England tana vawi thum inlan tawh midfielder hian season hmasa kha Burnley leh Aston Villa-ah loan-in hun a hmang a, tun season-ah Chelsea Under 21 leh U23 tan a inlan thung. 

Blues manager Frank Lampard chuan, "Danny tan chuan a khelh tam theihna hmun pan a, a tana a khelh leh hi a pawimawh a ni," tiin a player chu a inkhelh tam a duhsak thu a sawi. 

Chelsea-a thla 18 cham tura contract la nei Drinkwater hian 2015-16 season khan Leicester City chu Premier League-ah a champion pui a, a hming a chher hle. 

Kum 2017 khan King Power Stadium chhuahsanin Stamford Bridge hi a pan a, kum nga chhung atana contract ziakin a man zat hi pound maktaduai 35-a a ni. 

London club tan inelna hrang hrangah match 23-a khel hman a, mahse August 2018 hnuah erawh a inlan tawh lo - a inlan hnuhnun ber hi Community Shield a ni a, Manchester City an ngam lohna inkhelah bench aṭangin a lut. 

Season hmasa khan loan-in Burnley leh Aston Villa zawm mah se beisei angin a khel chuang lo - Clarets (Burnley sawina) tan match hnih chiah a khel hman a, Villa tan match li a inlan thung. 

Villa Park-a hun a hman lai hian club tana a khelhpui, Spanish attacking midfielder Jota nen an inhmu thiam lo a, March thlaa buaina a tawh hnu hian Villa tan a inlan leh tawh lo. 

Drinkwater hi Chelsea U21 tan tun season Papa John's Trophy-ah a inlan a, U23 tana Premier League2-a Tottenham Hotspur an hmachhawn ṭumin hnawhchhuah a ni bawk!