Trippier-a'n hremna a tuar tlang dawn

Football Association-in sum inthapna lama a inhman avanga kar 10 chhung inkhel thei lo tura a hrem Kieran Trippier-a hremna chu a club khelhna Atletico Madrid-in khinglet mah se FIFA chuan hremna hi kaltlangpui turin a ti a, Spanish club tan thu hriat nuam a ni lo ang. 

English football-a thuneitu sang ber FA hian December khan Trippier hi a hrem a, mahse, January khan Atletico chuan he hremna pawmpuitu FIFA lamah zualkoin hremna hi an khinglet. 

Atletico chuan FA-in an thuneihna hnuaia league club player ni lo, ram pawn league khel player an hrem thei lo tiin FIFA hnenah an thlen a, FIFA chuan thubuai a ngaihtuah chhung hian English defender hremna hi a hlip rih bawk. 

Mahse, FIFA chuan FA hremna hi pawmsakin, Trippier-a hremna chu khawvel pum tan a nih thu a sawi. Atletico erawh an beidawng duh lo a, infiamna khawvela thuneitu sang ber Court of Arbitration for Sport (CAS) hnenah an zualko leh ang. 

Trippier-a hremna hi a tirah chuan December 21 aṭang khan inṭan tura tih a ni a, February 28 hmaa hremna hi tawrh zawh tur a ni bawk - FIFA-in Atletico dilna hi an pawm tak lohah chuan hremna ang hian a inkhel thei lo zui dawn. 

Chutihrual chuan CAS lamin Atletico khinletna hi an ngaihtuah a nih chuan thutlukna an siam hma chu Trippier hian hremna hi a tuar rih lo ang - CAS thutlukna chu engpawh nise, hremna hian February 28-a pel thei lo bawk. 

FA chuan Trippier hian kum 2019-a Tottenham Hotspur aṭanga Atletico Madrid a pan dawn khan sum inchawina lamah text message hmangin a ṭhiante a pui niin an sawi a, match 10 khel thei loa an hrem bakah £70,000 (Nuai 69.74) chawi turin an ti bawk a ni. 

Tuna a lan dan chuan English defender hian La Liga match riat bakah Champions League last 16 first leg-a Chelsea an mikhual tur chu a khel thei dawn lo tihna a ni a, hrem chhung hian football kaihhnawiha a inhnamhnawih phal a nih loh avangin training pawh a nei thei lo ang. 

Trippier-a khelhna Atletico Madrid hian La Liga-ah hma an hruai mek a, anmahni hnaih bertu Real Madrid aia match hniha khel tlemin point liin an sang zawk. 

Atletico Madrid hi Ningani zan dar 2:00-ah league match khel turin an inlan dawn a, Eibar chu khualmualah an lenchilh ang - Nizanah La Liga match thum a awm a, result kan hre hman lo. Zaninah match thum a awm leh bawk ang.