Player kim lo East Bengal-in Chennaiyin chelh

Thawhṭanni zan Indian Super League inkhelah Chennaiyin FC leh East Bengal ten goal khung an harsat ve ve a, 0-0 in an inhnehtawk. 

East Bengal hian minute 31-naa an midfielder Ajay Chhetri hnawhchhuah a nih avangin hun tam zawk chu player kim loin an khel a, hetichung hian South Indian club an chelh thei. 

Kum 21 mi Ajay hian January 15 khan Bengaluru aṭangin East Bengal hi season tawp thleng khel turin loan-in a zawm a, a match hnihnaah red card a hmu nghal!

Second half-ah East Bengal an bet a, mahse goalkeeper Debjit Majumder an neih avangin an him. Indian goalkeeper hian Esmael Goncalves, Rahim Ali, Lallianzuala Chhangte leh Fatkhulo Fatkhulloev-te shot chu ṭha takin a dansak vek a, a team a chhanhim. 

East Bengal tan Anthony Pilkington chuan chance duhawm vawi hnih a nei ve tho a, a pawimawh ber goal erawh a khung thei bik lo. 

Chennaiyin tan hian Lallianzuala bakah Jerry Lalrinzuala chuan inkhel bul a ṭan bawk a, player pahnih hi South Indian club tan an khel chhe lo.