Arsenal chakna Aubameyang

Pierre-Emerick Aubameyang goal hnih leh Bukayo Saka goal hmangin Arsenal chuan an mikhual Newcastle United 3-0 in an hneh. Mikel Arteta naute hian point 27 hmuin Premier League table sang zual 10 zingah an lang ve ta.

Thawhṭanni zan inkhel zawhah Gunners manager Arteta chuan an captain in goal a khung chu a lawm thu a sawi a, dinhmun sang an thlen leh theih nan Aubameyang goal khung theihna chu an mamawh thu a sawi bawk.

Emirates Stadium a inkhelah Arsenal lamin ball chang tam mah se chawlhlawk hmain goal a lut lo. Second half tir lamah Aubameyang chuan Thomas Partey hnen aṭanga a through ball hmuh chu chiang tak maiin a khung. Newcastle goalkeeper Karl Darlow tan dan theih a ni lo.

Tun hnaia khel ṭha thei tak Emile Smith Rowe a hmuhnawm a, English midfielder hian amah ang bawka 'Hale End' chhul chhuak Saka tan a siamsak. Gunners tan tun hnaiah an academy chhuak pahnih hi an rin tlak thei hle a, an chakna hnar an ni ṭhin bawk.

Goal hnih an neih hnuah Arsenal lamin an la duhtawk mai lo. Season kal laia league bul a ṭanna hmasa berah Cedric Soares chuan chak taka ball lalutin Auba tan a siamsak a, goal luh theih nan hian Portuguese defender hian a hna hautak leh pawimawh chin a thawkah a ngaih theih.

Season hmasa khan Aubameyang-a'n Arsenal tan inelna hrang hrangah goal 29 a khung a, heng zinga goal 22 hi league-ah a ni. Contract mawm tak a ziak a, goal erawh a khung chhunzawm hleithei lo.

Newcastle United lakah pawh a 'nil' leh mai dawn niin a lang hman. Saka siamsak chu hnai tak aṭangin ban a tih per a, hun chanve hma lam a khel ṭha tawk lo bawk. Second half-ah erawh player dang tana khung mai theih loh tur Partey ball pek a khung a ni.

Gabon international hian tun season Premier League a goal nga khung tur pawhin striker awmna tur hmun dik takah ball a lo chang a, tlak mai hlauhthawnawma ding hman North London club tan an captain chet dan kha a thlamuan thlak leh tawh ang.

Kum 1994-95 season khan Arsenal hi league-ah 12-na an ni a, hemi hnua an chet chhiat ber ṭum an tawng meka ngaih a ni. Season hmasa khan pariatna ni mah se FA Cup an lak avangin sawiselna an tawk nep deuh.

Arteta-a'n goal khung aiin a venhim a ngai pawimawh hmasa a, defender Rob Holding a rintlak - English defender kiangah Gabriel, David Luiz leh  Pablo Mari an indin chhawk a, tun hnai an match hnuhnung pangaah goal an chhuah miah lo!

Tunah chuan tlarhnung inveng chunga goal nawr an thiam ṭan niin a lang, rawlthar rual hmaah striker Alexandre Lacazette leh Aubameyang ten an rintlakzia an ti lang mek a, season thara European football khelh an beisei ngam leh ta.

Table mawng lama talbuai Newcastle United manager Steve Bruce-a'n Arsenal lakah eng result pawh nei se a ban loh tur thu a sawi a, "Kawng dikah hruai ka tum," tiin Magpies a enkawl zel tur thu a sawi.

Sheffield United an hneh loh ṭumin player a thlan fuh lo thu a sawi. Sheffield hmachhawn player pariat ngawt siksawi chungin Emirates Stadium a pan, Joelinton, Almiron, Andy Carroll leh Callum Wilson ten bul an ṭan.

Tlarhma lam tih chak tum viau mah se goal hmaah an hriam thei lo a, point an hmuh hleih theih loh avangin English manager hma hun a chiang lo zui. Inrinni zana Aston Villa an lenchilh hunah an tlawm leh a nih chuan an ban a nih pawhin a mak lo ang.

Arsenal manager Arteta chuan, "Goal hmasa ber nei turin nghah rei ngai deuh mah se ka naute khelh danah sawisel tur ka nei lo, lawmna tur lam zel a ni rih. A bik takin rawlthar rual an khel ṭha ṭhin hian min ti lawm.

"Auba pawhin goal a khung leh ta, kan mamawh chu khatiang kha a ni. Goal a khung theih lai kha kan ngai em em a, tunah chuan kan nei let leh ta, ama tan a pawimawh bakah team chakna hnar a ni," tiin a sawi.

Newcastle manager Bruce chuan, "Kan theihtawpa ṭhain khel mah ila a tawk zo chuang si lo. Tun hnaiah kan result a ṭha lo, mahse Arsenal, Leicester, Liverpool leh Manchester City te kan hmachhawn tih hriat tel a ngai," tiin an fixture a hautak thu a sawi tel bawk.