Aizawl FC-in point hlu tak an hlawh chhuak

Nimin khan Aizawl FC-in coach thar Standly Rosario tel loin Real Kashmir an chelh a, Rajiv Gandhi Stadium-a I League inkhelah goal a lut lo.

Mizo club hian point khat an hlawhchhuah avangin Indian Arrows nen an point hmuh zat a inang chiah a, goal difference-ah an ṭhat zawk avangin 10-na aṭangin pakuanaah an inhlangkai.

Aizawl FC-in striker Ansumana Kromah leh Lalkhawpuimawia an chhawr theih loh avangin goal venhim an tum nghal a, defender panga an dah. Defence laiah Richard Kassaga leh Govin Singh awmin Kareem Omoloja-a'n a thlawp bawk a, C. Lalrosanga leh Vanlalthanga te a sirah an awm. 

Tlarhnung tichak turin Alfred Kemah Jaryan leh Paul Ramfangzauva te an la awm bawk a, goal venhim hna an ngaih pawimawh avangin tlar hmaa mal tlat Lalremsanga Fanai chu Rochharzela leh Leonce Dodoz ten thlawp bawk mah se Lengpui tlangval hi a mal hle.

Stadium announcer-in entu zat 1,235 tiin a puang a, I League entu atan chuan an tlem hle. Chumi piah lamah Aizawl FC leh Real Kashmir-te  inkhel chu inkhel en tura a kal chhunte tana inchhirawm tur khawpin a nung lo. 

Aizawl FC an tumah an chiang a, goal venhim hna an thawk ṭha hle. Hei chauh hi ni loin goal chance pawh nei hmasa zawk an ni a, Remsanga'n keeper Bilal Khan chauh a hmachhawn hnuah a pet over.

First half tawpah erawh Mizo club an inthlahdah hret a, Kashmir forward Abednego Tetteh chuan Gupreet-a ball tur chhuh hman mah se a muan hret avangin Aizawl FC keeper-in a tihsual a siam ṭha hman. 

He mi hnu hian corner aṭanga Mason Robertson-a ball tauh chu Aizawl FC defender Thanga'n goalline aṭangin a tauh chhuak. Second half-ah pawh mikhual team-in chance an nei ṭha zawk a, Danish Farooq leh Robertson-te goal hmaah an hriam tawk lo. Aizawl FC erawh chet fuh ṭum nei mah se Kashmir keeper Bilal an tibuai pha lo.

Aizawl FC coach lailawk Jonathan Lalbiakkima chuan, "Goal venhim kan tum tih kan player rem dan aṭang pawh khan a hriat theih ang. Chuvangin kan tan chuan point khat hi a hlu a, kan result-ah kan lawm. Kan inkhelh leh hunah chuan player-te an dam chho a, coach thar hoin ṭha lehzualin kan khel thei ang," tiin Vanglaini a hrilh.

Mizo club coach thar Standly Rosario chuan nimin khan Aizawl a rawn thleng a; East Bengal, Mohun Bagan leh Shillong Lajong coach hlui hian January 18-a Chennai City an tlawh hunah a enkawl tawh ang.

Real Kashmir coach David Robertson chuan, "Aizawl FC hi team ṭha an ni a, point kan hlawh chhuak hi kan lawm. Mizoram kan tlawh hma hian khualmualah match li kan khel tawh a, goal venhim chu kan thupui a ni a, kan hlawhtling. Khualmualah hneh loh kan la tawng lo a, a lawmawm takzet a ni," tiin a lawm thu a sawi ve bawk.