Mizoram tan Zonunsangi'n bronze a la

Pune, Maharastra-a neih mek Khelo India Youth Games-ah Zonunsangi chuan Ningani khan kum 17 hnuai lam inelna judo 48kg huangah bronze medal a la. 

Mizoram team hian weight-lifting-ah medal paruk an lak tawh bawk avangin nimin thleng khan medal pasarih an la tawh.

Tuirial tleirawl Zonunsangi hian nikum khan Delhi-ah bronze medal hi a lo la tawh bawk a, Khelo India neih tawha judo huang bikah chuan medal la hmasa ber leh awm chhun a ni mek.

Mizoram aiawh hian player pathum Vanlalfaka (U-60kg), R. Vanrammawii (U-52 Kg) leh Chinglunmawii (U-57 Kg) te chuan vawiin hian an khel ve leh ang.

SYS judo coach Lalrengpuia chuan, "Kan beisei angin medal chu kan la ta phawt a, a lawmawm hle. Vawiina inlan tur palyer pathum dangte pawhin Mizoram tan medal an hlawh chhuah theih ngei ka duhin ka beisei pui bawk," tiin Vanglaini a hrilh a, hlawhtlinna an chan chhunzawm theih nan Mizo mipuite ṭawngṭaipui turin a sawm bawk.