Arsenal-in player la thar dawn lo

Arsenal manager Unai Emery chuan tun January transfer bazar chhungin a nghetin player an lak loh tur thu a sawi chiang a, loan hmanga hawh tur an hmu a nih erawh chuan la thei an ni thung.

Nikum nipui bazar lai khan Gunners hian Lucas Torreira, Matteo Guendouzi, Sokratis, Bernd Leno leh Stephan Lichtsteiner te an lalut a, 2018 January thla khan Pierre-Emerick Aubameyang chu an player manto ber ni turin an lalut tawh bawk.

Gunners hi tun dinhmunah Barcelona midfielder Denis Suarez nen sawi zawm mek an ni. Emery chuan, "Suarez dinhmun tak hi ka sawi chiang thei lo, ka sawi chian theih erawh January thla chhung chuan a nghetin player kan la thei lo, kan hawh thei thung ang," tiin sum an hman loh tur thu a sawi.

Arsenal hian an player kawl lai zinga senior ber Aaron Ramsey chu nipuiah an chan ngei dawn tih a chiang tawh. Wales international midfielder hi European club lian tam takin lakluh an duh a, thu thar berah chuan Juventus nen inremna an siam tawh tih a ni.

Spanish manager Emery chuan, "Blackpool nen kan intawn dawn ṭum khan Ramsey hi inkhel turin ka ti a, phur takin khelmuala lutin a khel ṭha hle. A hma hun hi ama kutah a awm a, tunah chuan kan hnenah nitin hlim takin hun a hmang mek a ni," tiin a sawi.

Kum 28 mi Ramsey hi nikum November thla khan kum li daih contract zawrh a ni a, inremna an siam ngei dawn nia a lan hnuah hlawh tur chungchangah inrem thei loin club lamin an contract zawrh hi an hnuk kir, hei vang hian tun season tawp ruala a contract tawp tur chu pawh sei a tum lo a ni.

Arsenal hian zanin dar 6:00-ah West Ham an lenchilh dawn a, hliam vanga chawl mek defender Hector Bellerin, Laurent Koscielny, Nacho Monreal, Shkodran Mustafi leh midfielder Mesut Ozil te chu inlan thei tura beisei an ni.