Goal khung a ngai - Hazard

Chelsea hian tun hnai an league match hnuhnung pahnih Stamford Bridge-a an khelh bikah goal an khung lo a, playmaker Eden Hazard chuan zanin dar 11:00-a Newcastle nen an inkhelh hunah goal an khung ngei a ngaih thu a sawi.

Maurizio Sarri naute hian an mikhual Leicester City an hneh loh bakah Southamton chu goal awm loin an inhnehtawk pui a, mahni muala result hlawhchhuah atan chuan a duhawm loh hle. Italian manager Sarri-a'n a striker Olivier Giroud leh Alvaro Morata te a ringzo meuh lo, hei vang hian midfielder Hazard chu tlarhma laiah chhawr a ni fo.

Premier League season kal laia goal 10 khung tawh Hazard chuan, "Hmahruaitu Liverpool nen kan inkarah point 10 a awm tling, match khelh hmabak kan la ngah avangin umphak theih an la ni. Mahse, umphak tur chuan tun aia goal kan khung hnem a ngai," tiin a sawi.

Kum 28 mi Hazard hian 2020 June thla thleng daih Blues tan contract a nei mek a, tun dinhmunah chuan a pawtsei rih dawn lo niin a lang. Real Madrid nena sawizawm fo hlawh player hi Chelsea hian chelh reng an duh a nih chuan striker hriam leh goal khung thei, league mai ni loin Champions League thlenga champion pui tham an lakluh a ngaih hmel.