Pogba a dam, United-in an 'attack' dawn

Pathianni zan dar 10:00 hian Manchester United-in Wembley Stadium-ah Tottenham Hotspur an tlawh dawn. United manager lailawk Ole Gunnar Solskjaer tan fiahna hmasa ber tiin a sawi theih ang.

Manchester United-in Jose Mourinho hnuaiah attacking game an khel meuh lo a, club lian an hmachhawn dawn phei chuan goal venhim tumin game plan an siam a, 'bus park' chu an thupui ber a ni.

Norwegian manager Solskjaer hnuaiah  Cardiff City, Huddersfield Town, Bournemouth, Newcastle leh Reading te hmachhawnin an hneh vek a, goal 16 an khung bawk avangin an khelh dan hmang a dang tih a chiang a, statistics thlir ringawt pawhin a finfiah theih. Pathumna dinhmun hauhtu Spurs an hmachhawn hunah pawh an khelh dan an la thlak dawn chuang lo.

Solskjaer chuan, "Kan khelh dan hmang attacking game hi eng team pawh tum ila thlak kan tum lo a, kan ṭhat dan ber pawh a ni. Chutihrualin team ṭha erawh kan hriat hran a ṭul a, an ṭhatna pawh kan hriat a ngai. Spurs hi team ṭha an ni a, kan tumpui tawhte angin anni lakah chuan chance kan ngah dawn lo a, chuvangin ball tih muan dan bakah Wembley Stadium khelmual zauhna kan hman thiam a ṭul bawk," tiin attacking game an khelh zel tur thu a sawi.

Newcastle an hneh ṭuma inhliam Paul Pogba pawh Dubai-a training an neihnaah ngai a awh chho ṭan a, Tottenham nen a inlan ngei beisei a ni. Hetihlai hian Marcus Rojo erawh Argentina-ah a hliam enkawl turin a haw a, a khelh theih hun tur a la hriat loh thung.

Manchester United hian team ṭha an la hmachhawn lo tih erawh Solskjaer hian a pawm lo a, Norwegian manager chuan, "Fiahna chu kan hmachhawn tawh alawm. Khualmuala Newcastle hmachhawn chu fiahna a ni a, kan match hmasa ber khualmuala Cardiff kan tlawh ṭum te, Old Trafford-a kan hmatch hmasa ber te kha fiahna vek a ni," tiin Spurs an hmachhawn tur chu fiahna hmasa ber a nih loh thu a sawi.

Spurs erawh team ṭha bik an ni tih erawh a pawm a, Solskjaer chuan, "Team ṭha tak an ni a, anmahni um phak kan tum a nih chuan hnehna kan chan a ngai a. Chumi tur chuan ṭha taka kan khelh a ngai a ni," a ti. 

United manager Solskjaer-a'n pressure tih tlem nan 'fiahna hmasa ber a ni lo' ti mah se a nihna takah chuan tun hi fiahna hmasa ber chu a ni si. Tottenham manager Mauricio Pochettino hi United-in manager nghet atan an duh tih thawm te a awm a, Solskjaer pawhin hei hi a hai lo. Chuvangin Spurs laka United an mualpho chuan Solskjaer hi manager nghet ni lo thei dinhmunah a ding ngei ang.

United tlarhnung phui loh zia an sawi ṭhin a, Spurs tlarhma nen an intawng dawn. Tottenham hi Harry Kane hoa khel tur an nih avangin an chhe lo a, Asian Cup khel tur Son Heung-min an chelh avangin an goal nawr hi ṭum dang ang thoin a la na dawn. Hming langsar dang Dele Alli, Lucas Moura leh Christian Eriksen te an la awm a, United hian attacking game khelh pawh duh se loh theih loin goal venhim hna an thawh a ṭul thei a, an player neih dan bakah tun hnaia an khelh dan thlirin inkhel a hmuhnawm ngei dawn niin lang.