Copa del Rey Levante mualah Barcelona an tlawm

Barcelona-in hmanni lawka La Liga lama 5-0 a an sawp hnu Levante chu Copa del Rey last 16 first leg-ah an ngam lo a, khualmualah 1-2 in an tlawm.

 

Levante tan Erick Cabaco leh Borja Mayoral ten goal khat ve ve an khung a, hun tawp nan minute nga chiah a awm tawh tihah Philippe Coutinho chuan penalty aṭangin goal khat a khung ve bawk. 

Barcelona player langsar zingah Lionel Messi leh Luis Suarez te chu squad-ah pawh dah an ni lo a, January 17 zana second leg an khelh hunah chuan an tel tawh ngei a beiseiawm - an inhmachhawnna tur hmun hi Nou Camp a nih bawk avangin quarterfinal luh beiseina a la sang hle. 

Spanish La Liga table lama Barcelona el phak zinga mi Sevilla chuan 3-1 in Athletic Bilbao an sawp a, Nolito, Andre Silva leh Wissam Ben Yedder te chuan goal khat ṭheuh an khung. 

Barcelona boss Ernesto Valverde-a'n league lama 5-0 ngawta an sawp tawh hnu Levante a dah nau a, an thiampuipa Lionel Messi chu squad-ah pawh 

a dah lo. 

Messi bakah hian Jordi Alba, Gerard Pique leh Luis Suarez-te chu squad-ah hmuh tur an awm lo a, Valencia aṭanga loan-a an hawh defender Jeison Murillo chu a vawi khat nan inkhel bul ṭan tir a ni bawk. 

Barcelona in rem dan enin Catalan club boss Valverde-a'n awlsam takin Levante hneh theih a inbeisei tih a lang a, a beisei ang ngawt erawhin thil a kal lo. 

Inkhel ṭan aṭanga minute lina lekah Erick Cabaco chuan Levante tan goal hmahruai a khung a, minute 18-naah Borja Mayoral chuan khung ve lehin minute 20 chhung lekin 2-0 in hma an hruai hman!

Minute 20 chhung lekin Barcelona-in goal hnih an chhuah hman miau a, Levante lakah 'an vannei' tih ṭawngkam hman hi thil awm lo a ni hran lo - goal hnih an chhuah hma em avangin Barca fan-te tan comeback beisei chi a ni lo. 

Hun tawp nan minute nga chauh a awm tawh tihah erawh Barcelona hian goal khat an nei let ve hram a, Brazilian midfielder Philippe Coutinho chuan goal khat a thungrul - goal dang lut tur erawhin hunin a daih tawh lo. 

Barcelona goal khung hi tlai angin lang mah se second leg la khel leh tur an nih miau avangin goal hlu tak a ni a, Nou Camp an inkhelh leh hun atana Barca fan-te tana beiseina siamsaktu a ni. 

Kar thum liam taa Barca-in 5-0 a hnehna an chan ṭum khan Messi chuan hattrick a siam a, Suarez leh Pique ten goal khat ve ve an thawh bawk - Nou Camp-ah chuan Valverde-a'n a player ṭangkai te hi a hahdamtir tawh lo tawp ang. 

Barcelona boss Valverde chu a squad thlan dan chungchangah insawifiahin, "Squad ṭha ber anga ka ngaih ka thlang chhuak a ni. Risk a ni tih ka hria a, mahse a chang chuan risk lak a ngai si a ni," a ti. 

Barcelona hian Pathianni zan dar 11:00-ah league match an khel lehnghal dawn a, Eibar an mikhual ang - Valverde hian hemi ngaihtuah chung hian squad a siksawi niin a lang. 

Sergio Busquets chuan, "Coutinho penalty avang khan beiseina a la awm a, second half kan khelh dan en chuan beiseina la neih hi kan phu bawk a ni. First half-ah kha chuan kan mutthlu a, chu chu annin remchangah an la a ni," tiin inkhel ṭantir lamah rilru an pek tawk loh thu a sawi. 

Levante boss Paco Lopez chuan Messi awm lohna team hneh mah ni se a naute a chhuan thu sawiin, "Khawvela player ṭha ber tel loin an khel tih kan hria a, mahse ka naute khelh dan erawh chhuan tlak a ni," a ti a, a hlim hle.