Dortmund-ah Sancho a hlim

Jadon Sancho chuan tun dinhmunah chuan England lama kir tumna a neih rih loh thu a sawi a, a khelh mekna Borussia Dortmund-ah a hlim bakah hlawhtlinna chanpui a duh thu a sawi bawk.

Kum 18 mi Sancho hian 2017 khan Manchester City chhuahsanin khelmuala hmun a chan tam theihna tura ngaih Dortmund hi a zawm a, a tisual lo. Bundesliga match 17 a khelh tawhah goal ruk khungin assist vawi sarih a nei tawh bawk.

Dortmund tana a khelh ṭhat avangin Sancho hian hriat a hlawh zual a, an ram senior team tan pawh khel tura koh a ni hial. Sancho chuan, "Dortmund player ka ni a, he hmunah hian ka hlim. Inkhelh theihna hun ṭha min siamsaktu an ni a, ka tan chuan a hlu hle," a ti.

Bundesliga hmahruaitu Dortmund player duhlai chuan sawi zawmin, "Kan club hi chanchin hriatreng tlak hnutchhiah sak ngei ka duh, tunah hian league hmahruaitu ni mah ila kan dinhmun hi a la ṭha tawk lo, season tawp hunah a chung bera awm theih kan tum tur a ni," tiin a sawi.