Jordan-in last 16 an lut hmasa ber

Asian Cup 2019-a round of 16 lut hmasa ber chu rin loh takin Jordan an ni tlat - he team hian an match hmasa berah mipui barakhaiha Australia an hneh hnuin Syria chu 2-0 in an hneh leh a, match hnihah point ruk an hmuh tak avangin Group B aṭangin last 16 an lut chiang. 

Jordan tan hian Mousa Suleiman leh Tareq Khattab ten goal khat ve ve an khung a, Syria lamin a chhanletna tur an neih loh avangin 2-0 in hnehna an chang ta a ni - Syria erawh an match hmasa berah Palestine an inhnehtawkpui avangin an match hnuhnung bera Australia nena an inhmachhawn tur a hautak belh sawt dawn tihna a ni. 

Vawiin tlai dar 4:30-ah Vietnam leh Iran an intawng dawn a, he inkhel hi a hmuhnawm ang - Vietnam hi match hmasa berah Iraq lakah 2-3 in an vanduai a, Iran hi 5-0 ngawta Yemen sawptu an ni thung. Goal hmuh tam beisei a sual dawn lo tihna a ni a, Vietnam tan chak loh chuan Asian Cup mangṭhana a ni thei nghal bawk. 

Pathianni zan dar 7:00-ah Japan an inlan dawn a, Blue Samurai (Japan sawina) hi champion beiseiawm ber pawl ni mah se match hmasa bera Turkmenistan laka an chak dan thlirin lung a awi zan lo a, Oman lakah insiamṭhat an tum ang - hnehna an chan chuan last 16 an lut chiang dawn tihna a ni.