UAE hmaah India an 'vanduai'

Asian football powerhouse an ni a, player zingah Asian Player of the Year lo ni tawh an kat nuk a, inelna thlengtu an ni bawk a, an coach chu AC Milan leh Inter Milan lo enkawl tawhtu Alberto Zaccheroni a ni - kan sawi hi UAE an ni. 

Asian Cup khelh ṭan a nih hma kha chuan "UAE hmaah India an vanduai" tih ai chuan, "UAE-in India an sawp" tih hi kan mitthla thiam tawk a ni - mahse a hun a lo her chhuak a, UAE lakah India an vanduai tak tak!

Ningani zan khan inelna thlengtu UAE lakah India chu 0-2 in an tlawm a, result niloin khelmuala an inhmachhawn lai entuten 'vanduai' tih ṭawngkam hman a fuhna chhan hi an hria ang. 

UAE lakah India tlawm mah se an khelh ṭhat avangin fak an hlawh a, an vanneih ṭum ni se chak thei dinhmunah an ding - he result avang hian last 16 lut turin UAE dinhmun a ṭha sawt a, India tan beisei a la bo bik lo. 

Jeje-a'n inkhelh hma zanin Vanglaini hnenah, "Ka khup hliam vangin bul ṭan ka beisei lo," tiin 100% a nih loh thu a sawi a, a tan bench aṭanga bul ṭan a him zawk thu a sawi tel. 

Chennaiyin FC striker Jeje-a'n a sawi ang ngeiin Stephen Constantine-a'n Thailand laka a first eleven ngai a ring a, Jeje aiah Ashique Kuruniyan chu tlarhmaah Sunil Chhetri nen inkawptir an ni.

Inkhel ṭantir aṭangin India an 'hot' nghal a, a thlengtu UAE aia boruak an ngam avangin goal khung tuma nawr na zawk pawh India an ni - minute riatna lekah Sandesh Jhingan chuan vengtu nei loin goal  tauh luhna remchang ṭha tak a nei a, goal zawnah a tauh thei lo. 

Minute thum a liam chauh a, Sunil Chhetri ball siamsak ṭha tak chu Ashique Kuruniyan chuan um lutin goalkeeper chauh hmachhawn mah se a pet goal lo a, India an vanduai chhunzawm zel. 

UAE-in ball chang tam mah se India tlarhnung an inrem ṭhat avangin awmze neiin ball an keng hleithei lo a, counter attacking hmanga India-in an vuak let chu an dawl zo lo lek lek ṭhin. 

Minute 23-na a ni a, India bawk an hlauhawm. Anirudh Thapa chuan box chhunga awm Sunil Chhetri tan ṭha zetin ball a vawrh lut a, India captain hian rang takin lo tauh vat mah se Bahrain laka che ṭha em em mai UAE keeper Khalid Eisa chuan ṭha tak bawkin a dang nawn.

UAE tlarhma lam aiin a hnung lam kan hmu ngun zawk a, mahse India-in an chance neih an chhawr thei tlat lo - minute 41-na a ni a, UAE-in an hun neih ṭhat hmasak bera chhal theihah goal an khung nghal. 

Ali Mabkhout-a'n ṭha zeta ball a tlanluhpui hnuah Khaflan Mubarak tan a siamsak a, a hlah ve lo - goal luh danah Anas Edathodika leh Anirudh Thapa puh theih an ni a, goalkeeper Gurpreet Singh-a'n hnathawh tur a neih hmasak berah a hna a hlen loah a chhiar theih bawk. 

India-in si khat an phur a, coach Stephen Constantine-a'n goal khung an mamawh tih a hria. Halicharan Narzary la chhuakin Jeje chu second half ṭantirah a luhtir a, India goal nawr a na sawt.

Mizo tlangval hian penalty area pawn aṭangin mawi taka 'chip' luh a tum a, mahse goal chung kil sirah tak a kal a, Jeje vanneih ṭum a ni lo. Hnahthial tlangval a thawhrim chhunzawm a, a ke aṭanga chhuak ball chu Udanta Singh chuan ṭha zetin goal-ah a pet a, mahse bar a per hnuin a sawt chhuak a, India an vanduai zel. 

Blur Tigers vanduai a kaltluan laiin UAE erawh an vanneih chhunzawm - hun tawp nan minute hnih chiah a awm tawh tihah Ali Mabkhout chuan India tlarhnung a ṭhiah hnuin goal hnihna a khung leh a, hun tawp hmain chak tur a chiang hman. 

India tan Rowlin Borges freekick aṭanga ball kal chu Sandesh Jhingan chuan tauh mahse bar a per a, UAE-in anmahni chhan tur tlarhnung an neih loh karah pawh 'bar' a awm zel - hun a tawp zui a, UAE-in 2-0 in hnehna an chang. 

India coach Stephen Constantine chuan, "UAE-in hnehna an chan avangin ka lawmpui a, kan chance neih zozai en chuan match khatah chiah kan la chak hi kan inhmeh lo a ni. Goal chance kan siama kan khung si loh chuan a tawpa tuartu chu keimahni zel kan ni," a ti. 

English coach chuan tlawmna karah lawmna hmuin, "Ka player te khan an theihna zawng zawng an pe a, tunah hian rilru hnual tak player 23 ka kawl mek a ni. Kum rei lote liam ta kha thlir ula, UAE laka 2-0 a chak loh hi na kan ti lo ang. Mahse, tunah chuan kan rilru a na em em a, hei hian hma kan sawnzia pawh a tilang a ni," tiin a eng zawngin a thlir. 

Group A inkhel dangah India sawp hnu Thailand chuan beiseina nei thar ve lehin Bahrain chu Chanathip Songkrasin-a goal khung hmangin 1-0 in an hneh a, January 14 zanah India hian Bahrain an hmachhawn leh ang - team paliin last 16 luh an la beisei vek!

Constantine chuan, "Theihtawp chhuahin kan tho leh ang a, Bahrain hmachhawn turin inpeih kan tum ang," a ti a, knockout round luh a tum ruh hle.