Mizoram football team 3 inlan dawn

Khelo India Youth Games-ah vawiin chawhma dar 9:00 hian Mizoram Under 21 boys leh girls bakah Under 17 boys te an inkhel dawn a, inkhel pawimawh vek a ni.

Mizoram team hian inelna hmun Maharashtra pan tur hian Silchar an pan hmasa a, heta ṭang hian Kolkata-ah thlawk thlain 'City of Joy'-ah zan khat khat an riah hnuin inelna neihna hmun chu train-in an pan. 

Darkar 40 vel zet train-a an chuan hnuah Pune an thleng a, an thlen ni hian Opening Ceremony an neih avangin chawlh hahdam nan an hmang thei lo a, a tukah match an nei nghal a. Under 21 mipa team-in Maharashtra 3-0 in an hneh a, U21 hmeichhe team-in Himachal Pradesh 13-0 in an sawp a, champion lai Under 17 mipa team erawh Karnataka lakah 4-1 in an tlawm thung.

Category tinah hian team riat an awm a, group hnihah ṭhenhran niin a sang pahnih chu semifinal lut tur an ni. Mizoram U21 mipa team-in vawiin hian Chandigarh an hmachhawn dawn a, an khingpui tur hi Kerala nen match hmasa berah an inhnehtawk avangin fimkhur a ṭul ang. Coach Chawngthansanga leh manager Hmingthansanga te kaihhruai team hian hnehna an chang a nih chuan semifinal an lut dawn.

Under 21 hmeichhe team tan fiahna hautak a ni dawn. Coach Vanlalpeka hote hian an match hmasa berah goal 13 zet khung mah se team ṭha pahnih an la hmabak a, vawiina an khingpui tur Odisha hian match hmasa berah champion rinkai Tamil Nadu chu goal khat chauhin an hneh lo. Nikum khan Mizoram hmeichhe Under 17 team chuan knockout stage an lut lo a, tun ṭumah pawh Odisha hi an hneh zo lo a nih chuan semifinal luh a harsa dawn.

Mizoram Under 17 team-in nomawi humhim theih an inbeisei a, an bul ṭan dan erawh 'mangchhia' a ni thung. Amaherawhchu Mizoram hian insiamṭhatna hun ṭha an nei a, vawiin hian an group-a team nem bera ngaih Uttarkhand an hmachhawn dawn a, point thum chauh ni loin goal khung tam a pawimawh ang.