Andy Murray a chawl hnai?

Australian Open chu Thawhṭanni aṭang hian khelh ṭan a ni tawh dawn a, tun hnaia tennis thuthar lian ber erawh Andy Murray-a'n a tan inkhelh reng a harsat tur thu a sawi chhuak chu a ni.

Britain tlangval chuan, "Thla 20 chhung chu na nei chungin hun ka hmang a, dam turin ka theih leh thiam ang zawng zawng chu ka ti. Thla ruk liam ta a ka dinhmun ai kha chuan ka ziaawm ngei a, mahse natna hian min kiansan vek lo.

"Hetianga harsatna nei chung chuan ka inkhel zui zel thei ang em tih a chiang lo, ka duh dan chuan Wimbledon khelh leh ngei ka duh. Mahse, chu pawh chu ka thleng zo dawn em tih a chiang ta lo a ni. A ruka na nei reng chungin thla li emaw thla nga emaw ka khel chhunzawm thei dawn em tih a chiang lo," tiin a sawi.

World number 1 hlui Murray hi a khel bawr na vangin a buai ngun ta hle, kum 31 mi Murray hi nikum January thla khan zai a ni a; June thla khan rawn kir leh mah se match 14 bak a la khel leh lo, duhthusamin a dam thei lo a ni.

Grand Slam vawi thum champion tawh Murray hian ṭum hnih nomawi a chawi tawhna Wimbledon chu khelh leh ngei a duh. Amaherawhchu, tun Australian Open hi atan major tournament hnuhnung ber pawh a ni tawh thut mai thei.

Ningani zan khan Australian Open 2019 inkhel tur draw neih niin champion lai Roger Federer chuan a match hmasa berah Denis Istomin a hmachhawn dawn. Uzbekistan tlangval Istomin hi seeded chang phak lo niin Federer tan harsa vak loa hneh theih tura ngaih a ni. Mahse, Istomin hian 2017 khan he hmunah hian Novak Djokovic chu second round-ah a lo hneh tawh - Swiss star tan fimkhur a ngai dawn.

World number 1 Djokovic-a'n qualifying round paltlanga tling Mitchell Krueger a hmachhawn dawn thung. Serbian tlangval hian second round-ah Jo-Wilfried Tsonga a hmachhawn zui nghal thei dawn a, tournament tir lam aṭangin inelna a hautak nghal dawn niin a lang.

Grand Slam vawi 20 champion tawh Federer leh vawi 14 champion tawh Djokovic te hian Australian Open nomawi hi vawi ruk an chawi tawh a, Australian legend Roy Emerson-a record an nihrual mek, kuminah hian a tu emaw zawk hi an champion thei a nih chuan Melbourne-a sulhnu nei ṭha ber an ni nghal dawn a ni.

Seeded pahnihna Rafael Nadal-a'n hliam vangin Australian Open inbuatsaihna tournament khel thei lo mah se a inlan thei dawn a, Spanish star hian a match hmasa berah khawtual tlangval wildcard hmanga inlan James Duckworth a hmachhawn ang. Nadal leh Federer te an chak chho zel a nih chuan semifinal-ah an intawng ang.

World number 1 hlui Andy Murray-a'n seeded 22-na Roberto Bautista Agut a hmachhawn nghal dawn a, Britain tlangval hi world number 230 a nih avangin seeded a ni phak lo a, a tir aṭangin player ṭha a hmachhawn a ngai; chutih rualin a khingpui turte tan hmachhawn chakawm loh tak a ni ve thei bawk.

Hmeichhe world number 1 Simona Halep tan phuba lak theihna hun ṭha a awm dawn. Nikum August thla khan Halep hi US Open first round-ah Kaia Kanepi hneh loin a tla nghal, Estonia nula leh Romanian star te hi tun ṭumah pawh first round-ah bawk an inhmachhawn leh dawn a ni.

First round inkhel tur ngaihven hlawh zual zingah Serena Williams chuan German nula Tatjana Maria a hmachhawn dawn. American star hian Grand Slam vawi 24 champion Margaret Court-i record nihrual turin vawi khat champion a la mamawh a, chutih rualin a chak chho zel a nih chuan quarterfinal-ah seeded pakhatna Halep a hmachhawn a ngai dawn.