Lorenzo-a'n MotoGP a mangṭha ta

Bike intlansiakna sang ber MotoGP vawi thum champion tawh Jorge Lorenzo chuan atana inelna hnuhnung ber a hmachhawn a, infiamna a ngainat ber hi tunah chuan ui tak chungin a mangṭha a ngai ta.

Repsol Honda rider kum 32 mi hi Pathianni zana tlan Valencia Grand Prix-ah khan inlanin 13-na dinhmun a luah a, a teammate leh world champion ni bawk Marc Marquez chuan hnehna chang chungin a ṭhianpa hi a thlah.

Motosports an ngaihsanna, rider leh driver ṭha tam tak chhuah tawhna Spain rama Balearic Islands-ah Lorenzo hi a piang a, kum naupangte a nih lai aṭangin bike intlansiakna a ngaina nghal. Kum 2002 khan 125cc huangah a inlan ṭan, 2005-2007 chhung khan 250cc-ah tlan lehin Aprilla bike khalh chungin 2006 leh 2007 khan a champion. Theihna a neih san avangin MotoGP lamah a insuan lut chhunzawm.

Yamaha bike khalh chungin 2010, 2012 leh 2015 te khan MotoGP champion a ni thei a, a hnu lamah Ducati leh Honda bike khalh ve leh mah se Yamaha tana a vul lai a pha lo.

Nikum June thla khan Repsol Honda chuan an rider chawl ta Dani Pedrosa aiawh turin Lorenzo an lakluh thu an puang a, season hnih daih contract an ziak. Team ṭha zawm mah se Spanish rider hian tun hma lam a phak thei tawh meuh lo a ni.

Kumin June thla khan Assen Grand Prix tlan tura an inbuatsaihna lamah Lorenzo hi a chesual a, a hliam vangin intlansiak pali lai a hmachhawn thei lo. A hliam dam hnuah pawh ngai a awh leh ta meuh lo a, season khat daih contract la nei chungin a chawl ta zawk.

November 14, Ningani khan Lorenzo chuan, "MotoGP hi ka ngaina a, a nuam ber chu hnehna chan a ni. Nuamti viau mah ila kei leh ka team tan chuan chawlh hi thutlukna dik a ni," tiin a chawlh tur thu hi a lo sawi lawk tawh a ni.

Valencia Grand Prix-ah Lorenzo hian hnehna chang kher lo mah se fans lawm a hlawh, a chawlh tur thu hre lawka intlansiak en an nih avangin nasa taka ṭan bik a hlawh kha a mak lo. MotoGP intlansiak vawi 47 zeta hnehna chang tawhtu hian duhsak taka thlah a phu.

MotoGP huanga chak hnem pangana Lorenzo chuan, "Tunah chuan a tak takin a tawp ta! Hring­nunah hian engmah theih loh a awm lo tih hi ka zir chhuah a ni ṭhin a, bike intlansiakna sang ka mangṭha tih erawh thudik tak a ni ta. Season 17 chhunga ka sulhnu leh nunhlui chu nakina la keu let leh turin ka khup.

"Ka hmaa tih tur leh tih theih awm chi hrang hrang chu ngun takin ka ngaihtuah ang a, thurawn pawh ka ngaithla thei reng. Hringnun hian ka hmaah eng ang khawvel nge a rawn chhawp chhuah leh dawn tih chu ka thlir ang," tiin a sawi.

Lorenzo hun hnuhnung a nih avangin Marquez chanchinin sawi a hlawh nep deuh a, mahse Honda rider ropui hnuhma hi sawi hmaih theih erawh a ni lo. Marquez hian tun season bikah chauh pawh vawi 12 ngawt hnehna changin a vawi ruk nan world champion a ni.

Season a hman dan thlir kirin Marquez chuan, "Hnehna chan hi season khar dan duhawm ber a ni. Mimal ropuina chauh ni loin team championship lamah pawh hlawhtlinna kan chang hi a lawmawm takzet.

"Jorge tan pawh hun pawimawh a ni a, ani hi ka teammate a nih paih lamah elpui ṭha tak a ni bawk. Mi bik a ni a, MotoGP-in ani ang rider a nei hi a vannei," a ti. World champion hian season thar atana inbuatsaihna neih hmain chawlh hman a tum thu a sawi bawk.