Oman hmaah India an insiam ṭha dawn em?

Bangladesh leh Afghanistan an inhnehtawkpui hnuah India chuan World Cup qualifier khel turin Oman an lenchilh leh dawn a, zanin dar 8:30-ah an inkhel ang. 

India hian an match hnuhnung berah Afghanistan chu 1-1 in an inhnehtawkpui a, mipui aṭangin Blue Tigers duh khawp lohna thawm a ri ring hle. Blue Tigers enkawltu Igor Stimac-a'n a hna humhim zel a duh a nih chuan Oman lakah tal result ṭha hlawhchhuah a mamawh dawn a, mahse a awlsam lo ang. 

India hian Oman hi an match hmasa berah an lo mikhual tawh a, goal an khung hmasak zet hnuin 2-1 in an inlehthal tir - zanin hi Stimac leh a naute tan phuba lakna remchang a ni. 

India coach Stimac-a'n, "Player thar hlak khelhtir ka hlau lo," tiin Oman an hmachhawn hmain a sawi lawk a, Mizo tlangval Lallianzuala Chhangte hmuh 'chance' a sang tihna a ni. Afghanistan nena an inkhelah  Lunglei tlangval hi squad-ah a tel lo a, Lianzuala chuan, "Training-na hun a tlem avangin squad hi a thlak tak tak ang em a hriat loh a, ka tel dawn leh dawn loh ka sawi thei lo. 

"Theihtawp ka chhuah reng a, a bakah erawh Pathian kut a ni," tiin Vanglaini a hrilh a, beiseina erawh a neih ve thu a sawi lang zauh bawk. Afghanistan lakah bench aṭanga luhtir Seminlen Doungel chu si phurh suttu a ni a, Manipur tlangval hian Oman lakah bul ṭan a beisei a nih pawhin a awm lo hran lo. 

India leh Oman danglamna hriatna awlsam tak chu qualifier-a an sulhnu thlir mai hi a ni a, Blue Tigers aiin Oman an ṭha zawk tih hai rual a ni lo. Oman hian India-in an draw hlim Afghanistan chu vawi hnih an tum tawh a, ṭhenawm ram lakah hian goal kua an khung a, an lamah goal lut a awm miah lo thung!

Kolkata khawpuia India nena inhnehtawk  Bangladesh chu harsa lo takin 4-1 in an sawp tawh a, rin loh taka India nena inhnehtawk Qatar lakah 2-1 in an tlawm thung. Tun inelnaa goal li khung tawh Rabia Al-Alawi chu ven bik ngai tur a ni a, ram tana vawi 95 inlan tawh Saad Al-Mukhaini leh match 175 khel tawh Ahmed Mubarak Al-Mahaijri te hi tlarhnung pui tur an nih avangin Sunil Chhetri tan hna a hautak dawn. 

India-in Oman laka infuih phur an tum a nih chuan thawnthu hlui keu let loh chu an hahdamna tur a ni a, Oman nena an intum tawh vawi riatah vawi khat chiah an la chak ve. Oman hian vawi nga hnehna an chang a, vawi hnih an inhnehtawk - hetihchhung hian Oman-in goal 18 an khung a, Blue Tigers-in goal riat chiah an khung ve thei thung. 

Hriat tel tur chu Oman enkawltu Erwin Koeman hi player a nih laia Netherlands tana vawi 31 inlan thei a ni a, Dutch team enkawl mektu Ronald Koeman hi a nau a ni. Erwin hian Feyenoord, Hungary, Utretch, Southampton (assistant) leh Everton (assistant) enkawl hna pawh a lo thawk tawh a, a tawnhriat hi Oman innghahna pakhat a ni.