Khelmual Khawvel tlangzarh a ni ta

Vanglaini sports writer John Zothansanga lehkhabu ziah Khelmual Khawvel chu Lalnghinglova Hmar (Tetea), Mizoram Football Association honorary secretary chuan nimin khan a tlangzarh. 

Vanglaini Newsroom, Durtlanga Khelmual Khawvel tlangzarhnaah Lalnghinglova chuan thu sawiin, "Infiamna khawvel lam hawi lehkhabu kan nei tam lo hle a, chutiang lehkhabu kan nei ta hi ka lawm takzet a ni," tiin a sawi. 

Tetea chuan, "He lehkhabu hian infiammi te zinkawng ngaihnawm tak tak leh sports journalism khawvela tawnhriat ngaihnawm min hriattir a, chhiar manhla tak lehkhabu a ni," tiin a fak a, mipuite chu Khelmual Khawvel lehkhabu lei ngei turin a sawm. 

John Zothansanga hian 'Savun Hampuar: The Mizoram Football Story' tih chu kum 2017 khan a lo ti chhuak tawh a, sapṭawnga ziah he lehkhabu hi Indian sports website lar Khel Now chuan kum 2017-a Indian football lehkhabu ṭha zual panga zingah a lo telh tawh. 

Khelmual Khawvel lehkhabu hi hlawm hnihah ṭhen hran a ni a, 'An Thawnthu' tih leh 'Tawnhriat' tiin ṭhen a ni. 'An Thawnthu' tih huangah hian infiamna khawvela mi langsar Lionel Messi, Cristiano Ronaldo, Tyson Fury, Angel di Maria, Diego Simeone, Santi Cazorla, Isaiah Pead leh Steven Gerrard te zinkawng hautak leh ngaihnawm ziah a ni. 

Tawnhriat huang chhungah hian Sports Journalism-a tawnhriat ngaihnawm tak, Mizo infiammi langsar te nena inkawmna tarlan a ni a, Lalremsiami, Jeremy Lalrinnunga leh NT Biakkima te chanchin leh kawmna ngaihnawm tak chhiar tur a awm. 

Mizo infiammi langsar te chanchin bakah hian Khalid Jamil hoa Aizawl FC champion ṭuma thawnthu ngaihnawm, Coimbatore-a Mizo bike intlansiak chhim thu,  Football Players' Association of India (FPAI) Mizorama an rawn zin ṭuma chanchin ngaihnawm leh Jurgen Klopp-a ṭhianpa nena inkawmna te tarlan a ni. 

Mizo boxer hriat hlawh NT Lalbiakkima'n, "Dumbbell leina tur ka nei si lo a, lungtum chawi chungin Siaha ka tlan hel ṭhin," a tihte, Mizo hockey star Lalremsiami nuin, "India tana khelh a tum thu a sawi tirh chuan kan tan chuan nuihzatthlak mai a ni," a tihte hi lehkhabu ngaihnawmna belhchhahtu a ni. 

Jeremy Lalrinnunga pain, "India tan ka inlan thei ta si lo a, ka fa te avang tala hnam puanzar a inchawisan ka duh a ni," tia a sawite chu Khelmual Khawvel ti hlutu a ni a, chhiar ti nuamtu a ni. Sum nei lo chunga Messi chhungten 'risk' an lak dan te, Ronaldo-a'n retheihna a ngam dan te, rilru hahna (depression) hneh tura Tyson Fury-a'n a beih nasatzia te hi chhiar loh phal chi a ni lo. 

Synod Bookroom (Mizoram hmun hrang hrangah)

Baptist Bookroom (Mizoram hmun hrang hrangah)

Mizoram UPC Bookroom (Upper Khatla, Aizawl)

Pentecostal Bookstore (Millenium A3 Ground Floor, Aizawl)

Elpee Bookstore (Dawrpui, Aizawl)

Zomi Book Agency (Dawrpui, Aizawl)

RL Nutei Bookstore (Dawrpui, Aizawl)

Allied Enterprise (Dawrpui, Aizawl)

CVL BASS, (Electric Veng Chung, Aizawl)

Vanglaini Office, Zarkawt & Durtlang

*Rs. 200 man a ni, dawr ak leh kawngkam lehkhabu zawrhnaah lei tur a awm bawk.