Champion lai Portugal-in Euro C'ship khel dawn

Portugal chuan Euro C'ship 2020 khel turin Pathianni zan khan Luxembourg 2-0 in an hneh a, Bruno Fernandes leh Cristiano Ronaldo ten goal an khung. Group B inkhel dangah Ukraine leh Serbia te 2-2 in an inhnehtawk a, Andriy Shevchenko kaihhruai Ukraine hi chak loh nei loin Portugal nen an tling.

Portugal hian October thla khan Ukraine an hneh loh avangin tling lo thei dinhmunah an ding a, amaherawhchu Cristiano Ronaldo telna team an nih miau avangin harsatna hranpa an tawk lo. Euro C'ship champion lai hian kar liam ta khan Lithuania 6-0 in an hneh a, final round thleng turin Luxembourg hneh a tawk.

Stade Josy Barthel-ah mikhual Portugal-in Bruno Fenandes hmangin minute 39-na lekah an khung a, goal hmahruai hi Bernardo Silva siamsak a ni. Captain Ronaldo-a'n minute 86-naah chak nemnghehna goal a khung a, inkhel thunun chungin Luxembourg 2-0 in an hneh.

Cristiano Ronaldo hian Lithuania lamah hattrick a siam hnuah Luxembourg lakah goal a khung chhunzawm a, Portugal tan goal 99 a khung tawh. Ram tana goal khung tam ber Iran legend Ali Daei-a record goal 109 umpha turin goal 10 chiah a mamawh tawh.

Portugal captain Ronaldo chuan, "Record hi khum ngei ka duh," tiin record chelhtu nih a tum thu a sawi a, Juventus forward hian kuminah ringawt pawh ram tan goal 14 a khung tawh avangin record thar a siam theih ngei a rinawm hle.

Real Madrid leh Manchester United forward hlui Ronaldo chuan, "100% in ka fit lo a, tunah pawh duhthusamin ka fitness a la ṭha lo. Kar thum chhung chu ka theihna angin ka khel chhuak lo a, amaherawhchu club leh ram tan a nih tawh chuan ka theihna zawng zawng ka hlan ṭhin," tiin a sawi.

Ronaldo hian result ṭha neih piah liamah Lionel Messi nen khawvela player ṭha ber nih inchuhin record an inneih ṭhatsiak a, Luxembourg mipui pawhin an hmachhawn player hi hrechiangin 'Messi, Messi, Messi' tiin an au el.