A thiam inelnaah Tsitsipas a champion

Mipa tennis chuan hmel thar a hmu a, player ṭha zual pariat inelna ATP Finals-ah Stefanos Tsitsipas chu a vawi khat nan a champion. Greek tlangval hian Dominic Thiem hnehin a vawi khat inlannaah hlawhtlinna hi a chang.

Pathianni zan khan O2 Arena, London-ah final hi khelh niin, kum 21 mi Tsitsipas hian Thiem lakah 6-7 (6-8), 6-2, 7-6 (7-4) in hnehna a chang a, tennis a khelh hun chhunga a nomawi lian ber hi a chawi.

Australian legend Lleyton Hewitt (2001) hnuah Tsitsipas hi ATP Finals-a champion thei naupang ber a ni a, player ropui Roger Federer, Novak Djokovic leh Rafael Nadal te inlanna tournament-a nomawi chawi hi a tan a hlu zual ngei ang.

Season hmasa khan rawlthar ṭha zual inelna NextGen tournament-ah hlawhtlinna a chang a, kuminah senior player inelna hmunah a chungnung ber a ni leh ta. Greek tlangval hi a kum a la tlem a, hmabak nei eng berte zinga mi a ni.

Thiem nen nomawi inchuhna inkhelah an inbei tawk hle, set khatna hloh mah se set hnuhnung zawkah erawh a vannei zawkah a ṭang ve ve, darkar hnih leh minute 35 an inkhelh hnuah kum upa zawk a ngam avangin inrintawkna a ngahin a rilru a paukhauh tih a hriat.

World number 6 Tsitsipas chuan, "Point ṭhenkhat kan inchuh lai kha chuan ka hlauthawng ngei mai, mahse hlauthawng chunga ka khelh chuan ka dinhmun a chhe dawn tih ka hriat avangin ka intipaukhauh lui nasa hle. "ATP Finals nomawi chawi chunga season khar theih hi duhthusam a ni a, ka naupan lai aṭanga tennis tournament liana hlawhtlinna chan ve hi ka lo suangtuah ṭhin a nih avangin a hlu zual hle," tiin a sawi.

Dominic Thiem-a'n season ṭha tak a hmang, a zawna a kum hnih nan French Open final a lut. Paris khawpuiah nomawi chawi chiah lo mah se inelna dangah ATP titles panga ngawt a lak avangin a tan kum ṭha a ni.

ATP Finals-ah pawh champion tura rinkai Djokovic leh nomawi kawl mektu Alexander Zverev a hneh thei a, nomawi inchuhna inkhelah pawh set la hmasak zawk a ni. Mahse, set hnuhnung pahniha a vanduai vang chauhin duhthusamin a tawp a khar ta lo.

Austrian tlangval chuan, "Ka tan chuan tuar a har, mahse engkim mai hi zirlai zel a ni. Tun inelna aṭang pawh hian zirlai tam tak ka zir chhuak, ka tan a tawpna leh a hnuhnung ber a nih loh ngei ka beisei," a ti. Kum 26 mi Thiem hi player puitling a ni tawh a, a khelh fuh ni chuan player ṭha ber berte pawh a hneh ṭhin. Tun season chu world number 4 ni chungin a khar dawn a, season tharah ṭha zawkin a inlan leh theih ngei a rinawm - a bikin clay court huangah a hlauhawm leh ang.