Aizawl FC-in pakhatna dinhmun an nemnghet

I League club Aizawl FC-in Mizoram Premier League Season 8 league round-a pakhatna ni turin Thawhṭanni zan khan Chhinga Veng 1-0 in an hneh. Standly Rosario hote hian match 13 khelhah point 30 an hmu a, anmahni hnaih bertu Mizoram Police-in an umpha thei lo.

Chhinga Veng erawh an chak loh avangin semifinal khel lo thei dinhmunah an ding. Lalremruata leh Anand Gurung-a te kaihhruai team hian November 21, Ningani tlaiah Electric Veng FC an hmachhawn ang a, point an hlawh chhuak lo a nih chuan club dang result-ah an innghah a ṭul ang.

Aizawl FC leh Chhinga Veng inkhela danglamna thlentu chu Alfred Kemah Jaryan a ni a, Mizo club tana rinawm tlat Alfred hian a tih tawh ṭhin angin 'Red Army' te lawmna a siam. Minute 68-naah Alfred hian Chhinga Veng player pathum bumin box chhung aṭangin goal mawi bik a khung a, inkhela goal awmchhun a ni. 

Liberian player Alfred hian MPL3 zawh khan Aizawl FC a rawn zawm a, Mizo club-in I League an khelh theih nan player pawimawh a ni. MPL history-a club mal kal fawr ber ṭum chu MPL4-a Aizawl FC kha a tih theih a, khami 

ṭum khan Alfred hian mimal lawmman dawng lo mah se final-a Chanmari FC laka goal hnih a khungte kha a chanchina chhinchhiahtlak a ni.

Alfred-a ropui ber ṭum erawh Aizawl FC-in I League nomawi an chawi ṭum kha a ni a, Liberian player hian captain armband hreng satliah loin team boruak ti ṭhatu a ni. Aizawl FC hi tun thlengin NorthEast aṭanga I League nomawi chawi thei awmchhun an ni a, best midfielder-a thlan Alfred hian club dang aṭangin sawmtu pawh nei mah se Mizo club tan a rinawm chhunzawm zel.

Season liam ta khan Aizawl FC-in a lungthu kim nan MPL-ah an champion a, hemi ṭumah pawh hian Alfred hi danglamna thlentu a ni a, best player-ah thlan a ni. Kuminah pawh Alfred hi Aizawl FC tan player ṭangkai an ni a, team hotu a la ni reng.

Aizawl FC technical director Hmingthansanga chuan, "Academy player ṭhahnem tak senior team-ah kan senglut a, semifinal pawh hi thlen a harsa dawn tih kan hre sa. Amaherawhchu, Standly Rosario hoin kan naute an thawkrim a, nasa takin hma an sawn a, pakhatna dinhmun hial kan hauh hi kan lawm hle a ni," tiin Vanglaini a hrilh.

AFC hian I League nomawi bakah MPL club hlawhtling ber ni turin vawi thum an champion tawh a, tunah hian nomawi palina an beisei leh mek. Hemi kawngah hian Hmitngthana hi an thluak bur a ni a, fakna leh sawiselna karah club ṭhat dan tur bera hriatin hma a lak ṭhinna hi I League club danglamna a ni.

Chhinga Vengin Alfred goal ropui vangin an chak lo a, chutihrualin vanneih ṭum chu ni se chak thei dinhmunah an ding. Chhingcows forward MC Malsawmzuala pet chu Aizawl FC keeper Lalremruata'n ṭha zetin a dang a, ITI Veng tlangval hi a inhliam zui bawk.  

Goal la luh hmain Lalchungnunga thawhrah chu Lalsawmzela'n a khung a, Chhingcows-in hmahruaiah inngai mah se offside vangin pawm a ni lo. MC Malsawmzuala pawhin goal khung ngeina tur chance ṭha nei tur a ni a, amaherawhchu referee-in 'play on' pe loa 'foul' a ham zawk avangin Siaha tlangvalin goal khung theihna hun ṭha a chan.

Chhingcows coach Anand Gurung chuan, "Offside kha kan ṭhutna aṭanga han sawi ve chiam a rem lo a, replay ka hmuh loh bawk avangin referee thutlukna kan pawm a ṭul. Play on pek chungchangah pawh referee han dem viau a har, hun tlemte chhunga thutlukna siam a ṭul avangin ṭha zawk tura a ngaih kha kan tan a ṭha ta lo deuh mai a ni," tiin Vanglaini a hrilh.

Chhinga Veng FC    0 - 1    Aizawl FC