Australian Open sawn duh Djokovic

Novak Djokovic chuan tun hnaia ram kang nasa vangin Australian Open khelh hun chu sawn hlat mai theih ni se a duh thu a sawi chhuak, tournament buatsaihtu lam erawh chuan thuchhuah an la 

nei lo thung.

Australia ramah kangmei a chhuak nasa a, season khat chhunga Grand Slam hmasa ber Australian Open khelhna tur khawpui Melbourne Park pawh meikhu in a khuh nasa hle. Nipui boruak an hman mek a lum zual a, boruak a thianghlim tawk lo bawk.

World number 2 Djokovic chuan, "Zawhna zawh, rawtna siam leh duhthusam sawi chu mi tinin kan tih theih a ni. Kei pawhin kan dinhmun leh boruak awm dan thlir chuan inelna hi sawn theih nise ka duh hle," tiin January 20 aṭanga khelh tur Australian Open chungchang a sawi.

Serbian tlangval chuan sawi zawmin, "Inelna hlawhtling leh ropui a nih leh ngei a rinawm a, chumi tur chuan player tin ṭha taka an khelh a ngai. Player ten duhthusama hun an hman theih nan chuan khaw lum leh boruak chungchang pawh ngaihven tel a ngai. Inkhelh hun sawn erawh duhthlan tur dang a awm tawh tlawt loh hnua tih theih chauh a ni tih ka hria," tiin a sawi bawk.

Hard court inelna lian Australian Open-ah hian Djokovic hi nikum khan a vawi sarih nan a champion a, kuminah pawh hian nomawi humhim leh thei tura ngaih a ni. Ruahman sa anga an khel a nih chuan January 20 aṭanga khel ṭanin February 2-ah an zo ang.