Spain hna a awlsam

Euro 2020 qualifier chu Spain-in harsatna nei loin an khar a, match tawp ber an khelh hmain tling chiang tawh mah se inthlahdah nan an hmang lo - an mikhual Romania chu 5-0 in an sawp. 

Spain tan Fabian Ruiz chuan minute riatna lekah goal hmahruai a khung a, Gerard Moreno chuan goal hnih khung zuiin Adrian Rus (own goal) leh Mikel Oyarzabal ten goal khat ve ve an khung bawk. 

Group F inkhel dangah Spain ang thoa tling chiang tawh Sweden chuan 3-0 in Faroe Islands an sawp a, Sebastian Andersson, Mattias Svanberg leh John Guidetti ten goal khat ṭheuh an khung. Spain hian nimin tlai khan khelmual pawnah chanchinthar an nei zui a, thla nga hnuah Luis Enrique chu an coach ni turin a lo kir. Barcelona boss hlui hian June khan thla 11 a enkawl hnuin Spain chu chhungkaw thil vanga a chawlhsan thu a puang. 

August khan a fanu, kum kua mi Xana chu cancer natna vanga a thih thu puan a ni zui. Enrique awm loh chhung hian assistant coach Robert Moreno chuan team a kaihruai a, Enrique hian a thlak leh dawn ta a ni. Spanish Football Federation president Luis Rubiales chuan, "Qatar World Cup 2022 thleng Enrique hi a cham ang," tiin a sawi.