Champion lai Croatia an chak lo

Ram leh ram mipa tennis team hmanga inelna Davis Cup-ah champion lai Croatia chu an group match hmasa berah an chak lo, group B inkhelah Russia chuan 3-0 in an hneh a ni.

Spain khawpui Madrid-a mipa singles inkhelah Borna Gojo chu Andrey Rublev lakah 6-3, 6-3 in a chak lo. Karen Khachanov pawhin Borna Coric chu 6-7 (4-7), 6-4, 6-4 in a hneh a, Russian pair hian doubles match-ah hnehna 

an chang bawk.

Thawhṭanni zan group F inkhelah Canada tan Vasek Pospisil leh Denis Shapovalov te chuan singles match-ah hnehna changin, an ram hi Italy lakah 2-1 in hnehna an chanpui. Italy lam hian doubles huangah bak hnehna an cheng ve lo a ni.

Kumin aṭang hian Davis Cup khelh dan phung tih danglam a ni a, ram 18 inlan chu group parukah ṭhen hran an ni. Group tina mi hi an inkhelh kual hnuah a sang pahnih an tlang a, pathumna zinga a ti ṭha pahnihin quarterfinal an lut thei bawk ang.

November 23, Inrinni hian semifinal match pahnih khelh tura ruahman a ni a, November 24, Pathianniah a thiam ber zawnna neih chhunzawm leh nghal tur a ni bawk.