MPL khelh tum club pathum
Mizoram Premier League khel tur zawnna qualifier chu November 21, Ningani aṭangin Lammualah khelh ṭan a ni dawn. Kumin qualifier-ah Aizawl District club pahnih Kanan FC leh FC Bethlehem bakah Kolasib club Project Veng FC te an inhmachhawn dawn.
Nimin khan MPL qualifier fixtures hi a chhuak a, club pathumte hi vawi hnih ṭheuh an inkhelh kual hnuah a sang berin season tharah MPL an khel ang. Pahnihna ni pha tan playoff khelh tur a la awm dawn a, MPL8-a pasarihna nen double legged playoff an khel leh dawn a ni.
Kanan FC hian ADFA First Division League champion turin Aizawl FC Academy an hneh a, MPL-a tawnhriat nei ṭha coach Chawngthansanga enkawl an ni. MPL Handbook-ah MPL club academy team tan Mizorama inelna sang ber a khelh theih loh avangin Aizawl FC Academy tan qualifier khelh theih a ni lo.
Aizawl DFA aṭanga hmunruak pakhat la awl hi First Division semifinalist FC Bethlehemin an hnawh khat ta thung. Qualifier-ah hian District FA-in team hnih zel an thawh thei a, amaherawhchu inelna hmachhawn tur hian MPL criteria zawm a ṭul thung.
Kolasib club hlun Project Veng FC chu Aizawl pawn aṭanga tel ngam awmchhun an ni a, Project Veng FC hian tun hnaiah nasa takin hma an sawn a. MPL hma pawhin Kolasib-ah Chanmari FC chah thlain friendly match an neihpui a, club inrelbawlna pawh ṭha takin an kalpui a ni.
MPL Qualifier Fixtures
November 21, Ningani
Kanan FC 1:00 PM FC Bethlehem
November 23, Inrinni
Project Veng FC 1:00 PM Kanan FC
November 26, Thawhlehni
FC Bethlehem 10:00 AM Project Veng FC
November 28, Ningani
Kanan FC 1:00 PM Project Veng FC
November 30, Inrinni
FC Bethlehem 1:00 PM Kanan FC
December 2, Thawhṭanni
Project Veng FC 1:00 PM FC Bethlehem FC