Ireland beiseina chhem kiangtu Denmark

Republic of Ireland-in Euro 2020 khel tura automatic qualification hmanga tlin an beiseina chu Denmark chuan an tih rehsak a, Ireland-in Euro 2020-a an hmun tichiang turin nakkum thleng an nghah leh phawt a ngai dawn. 

Thawhṭanni zan khan Ireland chuan Denmark hi an mikhual a, tling chiang turin chak an mamawh. Denmark tan draw result a tawk thung a, mikhual team hian an duh ang result hlawh chhuakin 1-1 in an inhnehtawk. Denmark tan Martin Braithwaite chuan goal hmahruai a khung a, Ireland-in minute 85-naa Matt Doherty goal hmangin beiseina thar insiam ve leh mah se chakna goal khung turin hunin a daih tawh lo. 

Group D inkhel dangah Switzerland chuan 6-1 in Gibraltar an sawp a, group hmahruaitu nichunga Euro 2020 khel turin an tling chiang. 

World Cup 2018 playoff-ah khan Denmark bawk hi Ireland veltu an lo ni tawh a, Christian Eriksen chuan a ropuina hmaah Ireland zamral tirin hattrick a siam a, 5-1 in Denmark an chak. Thawhṭanni zanah erawh Ireland an khel ṭha a, an khelh dan aṭanga thlir chuan Euro khelh an phu. Mahse, an chance neih hmasak berah Conor Hourihane chuan goalkeeper Kasper Schmeichel zawnah tak a pet a, an thlirlet apiangin an ui ang. 

Alan Browne-a volley ṭha tak chu goal sirah chiah a kal a,  khel ṭha em em mai David McGoldrick chuan a chance neih a chhawr thei bik lo - Newcastle United midfielder Ciaran Clark chance hlah zozai te kha ui loh chi a ni lo. 

Ireland-in an beisei ang result hlawh chhuak lo mah se khelmualah an theihna zawng zawng an hlan tih fan-ten an hmu a, inkhelh zawhah ding chungin player-te zahna an lantir. 

Ireland-in qualifier hmangin European championship inpetkai zo lo mah se nakkumah playoff hmangin beiseina an la nei thei a, playoff atan rilru an seng ṭan ang. Coach Mick McCarthy chuan, "Playoff-ah hian tu pawh kan hneh thei," tiin a sawi a, a naute rilruah inrintawkna tuh a duh. Sunderland boss hlui tana buaina tur erawh March-a playoff an khelh hma hian Ireland-in match an nei tawh dawn rih lo a, player remkhawm a harsa ang. 

Irish coach chuan, "Ka player-te hi an club khelhna ṭheuhah an kir ang a, March thleng chu match kan nei dawn lo bawk. Mahse, ka naute bulah qualifier ṭha tak kan khelh thu ka hrilh ang a, tuna ka khelh dan anga khelchhuah hi March-ah kan mamawh leh dawn tih ka sawi ang," a ti. 

Ireland hi an vanduai hle - qualifier match riat an khelhah vawi khat chiah an tlawm a, vawi li draw result an neih chu an tuar ta a ni ber. 

Switzerland-in Euro khelh an phuzia khelmualah an lantir a, an mikhualna ramah awm dan mawi lantir duh loin Gibraltar lakah goal ruk ngawt an khung - 6-1 in an chak. Swiss team hian minute 10-na aṭangin goal an khung ṭan a, Cedric Itten chuan goal hmasa ber hi a khung - minute 84-naah a khung leh bawk. Kum 22 mi forward bakah hian Ruben Vargas, Christian Fassnacht, Loris Benito leh Granit Xhaka te chuan goal khat ṭheuh an khung bawk. 

Ocotber thla tawpa Arsenal fan-te nen an intihbuai hnua Gunners tana inlan leh tawh lo Xhaka-a'n ram tan goal a khung a, Swiss midfielder hian Emirates Stadium-ah lawm hlawh lo mah se a thiam a la theihnghilh lo tih a pholang. 

Gibraltar tan hian English sixth division club Hereford striker Reece Styche chuan goal awmchhun a khung a, qualifier match riat an khelha goal thum an khung vena chauh a ni!