Dinthar bye bye-tu Chanmari mipuite kha

April 28, 2014 chhuak Vanglaini phek hnungah chuan '5-4 a la tawp lo, a in ṭan dawn chauh... MPL Final-ah Chanmari FC Vs Luangmual FC' tih a inziak kalh. A hun lai chuan a thupui aṭang hian engkim a chiang nghal a, tunah erawh sawi zau leh hret a ngai ta. Chanmari FC hian Mizoram Premier League Season 2 final an lut tawh nachungin an hmelma Dinthar FC nena nomawi inchuh duh loin league round match hnuhnung berah Maimawms final kawng an dalsak.

MPL8-ah Chanmari FC-in nuam sain semifinal an lut thei tawh lo a, Dinthar chunga an tih hi Aizawl FC hmangin an chungah a let thei! Tun dinhmuna a lan dan chuan Chanmari leh an veng ṭhenawm Electric Veng te hian semifinal hmunruak pakhat inchuh dawn - MPL boruak a nung chho zel.

Chanmari mipuiin 'Dinthar bye-bye, Dinthar bye-bye, Dinthar bye-bye...' tiin inkhelh tawp lamah an au rual dual dual a; Dinthar mipuiin an hrethiam thei lo, referee-in hamrik hnuhnung a ham hnuah hnukulh an tam a, kil tinah mittui parawl an awm a, mittui tla an bang lo. A hmuna awm ve lo tan Lammual boruak hi hriatthiam phak bak a ni a, football ropuina a lang chiang hle.

Mahindra 2 Wheelers Mizoram Premier League Round 14 chu duhthusama khar a ni. Final lut chiang tawh Chanmari FC chuan Dinthar FC 5-4 a hnehin Luangmual FC tan final kawngkhar an hawnsak a, champion thar kan hmu dawn ta. Chanmari FC hi phase 2-ah chak vekin point 35 hmuin MPL season khata point hmu tam ber record an siam.

Dressing room aṭangin head coach T. Vanlalhluna a rawn chhuak a, a fanuin mittui tla zawih zawih chungin a pa chu a rawn kuah a; Local football-a hun rei tak inhmang tawh Dinthar head coach meuh pawh a insum thei lo a ni ber. Hluna chuan, "Chanmari FC hian min hlau a ni, mipui tam dan leh an khelh dan thlirin final-ah chetsual an hlau a ni. Final-ah kan hneh thei tih min hriat avangin kan dinhmun chhiat laia (chak ngei ngei ngai) min hneh hi an duh a ni," tiin thil thlen dan a sawi fiah.

MPL2 nena thlirin tun season-ah entu mipui an tam tawk lo a, hei hian khelmual thlengin nghawng a nei a, mipui tel lo chuan inkhel a nung thei lo. Point dinhmun thlirin MPL2 ai mahin tun season hi boruak sang thei tur a ni a, amaherawhchu mipui an tel loh chuan khuang loa chai ang chauh a ni dawn.

Kum nga liam ta khan Dinthar head coach Hluna chuan, "Mipui tam dan leh an khelh dan thlirin," tiin mipui pawimawhna a sawi lang a, tun season-a sum tam tak sengtu Chanmari FC hian an tum ram thleng turin khelmuala an mamawh an nei tawh. Tunah chuan mipui puihna an mamawh ang.

Zirtawpni zana inkhel tur Chanmari leh Aizawl FC hi MPL hmasa ber playoff aṭanga inel chho tawh an ni a, AFC ṭantu 'Red Army' ten an 'Bye Bye' a nih ngat chuan Dinthar mipui tem ang tlem a zawng an hre pha ang. Chutah an veng ṭhenawm Electric Vengin semifinal hmunruak an chang ta zawk a nih chuan hawi san a har dawn. 

Tun hi Chanmari leh Electric Veng tan a kaw tawpa ṭan hun a ni a, mipui an tel ngei a ṭul tawh. Team ṭha pahnih hi an match hnuhnung pahnihah an chesual ve ve a, point ruk hmuh theih aṭangin point khat chiah an hlawh chhuak. Tun dinhmunah point 16 ve ve an hmu a, head to head-a ṭha zawk Electric Veng dinhmun a ṭha hret.

Season liam ta khan Dinthar FC tawn ang deuh hi Electric Vengin an tawng tawh a, midang result-a innghah hrehawmzia hrechiangtu an ni. EFC hian Ningani tlai dar 4:00-ah Chhinga Veng an hmachhawn dawn a, point thum a hlawh chhuak lo a nih chuan I Day Football champion hian an la thlen ngai loh MPL semifinal thleng pha turin an nghah leh a ṭul ang.

Electric Vengin an club kum 25-naah MPL nomawi an duh chuan an veng mipui an ṭhanharh a ṭul a, Chanmari FC pawhin nomawi an duh a nih chuan Dinthar bye bye-tu Chanmari mipui te koh kir a ṭul dawn a ni.