Italy vawi 10-ah vawi 10 an chak

Euro 2020 qualifying round-ah Italy-in match 10 an khelhah hnehna an chang vek a, Thawhṭanni zana an match hnuhnung berah Armenia chu 9-1 in an sawp. Roberto Mancini kaihhruaina hnuaiah Azzurri hian record ṭhahnem tak an siam a, 2006 World Cup champion hian kum 1968 hnua a vawi khat nan Euro C'ship-ah nomawi chawi an tum dawn a ni.

Stadio Renzo Barbera, Palermo-a inkhelah hian  Italy tan Ciro Immobile leh Nicolo Zaniolo ten goal hnih ve ve an khung a; Nicolo Barella, Alessio Romagnoli, Jorginho, Riccardo Orsolini leh Federico Chiesa ten goal 

khat ṭheuh an khung.

Italy hian group J match 10-ah hnehna an chang vek a, anmahni hnaih bertu Finland aiin point 12 zetin an hmu tam zawk. Tun ṭum hi major tournament khel tur zawnnaa Azzurri an chak vek vawi khatna a ni a, kum khat (calendar year) chhunga an chak tam ber ṭum a ni a, kum 2019 hian vawi 10 an chak.

Azzurri hi kum 1990, 1994, 2000 leh 2003 te khan vawi kua an lo chak tawh bawk. Euro 2020 qualifying-ah hian Italy leh Belgium ten 100% chak record an nei a, Mancini hoten Armenia an hmachhawn hmaa anni  aia goal difference record nei ṭha chu Belgium (+32) leh England (+27) te chauh an awm a, inkhelh zawhah erawh Azzurri goal difference chu +33 lawih a tling.

Mancini hnuaiah a zawnin  match 11 an chak a, hei pawh hi Italy tan record thar a ni. Azzurri hi Vittorio Pozzo hoin 1938-39 chhung khan vawi kua a zawnin an chak tawh a, Manchester City manager hlui hoin kum 2019-ah an khum thei chauh.

Italy chak chian ber record erawh 1948 Olympic-a USA 9-0 a an sawp ṭum kha a la ni chhunzawm a, tun ṭumah hian record tlukpuina hun ṭha nei mah se Armenia-in goal khat an khung avangin record an nihrual pha ta lo. Mak ang reng tak chu Italy hian Armenia vawi nga an hmachhawn tawhah vawi khat chiah an la clean sheet hrim hrim.

Italy tana goal hnih khungtu Lazio striker Ciro Immobile chuan, "Kan zinkawng a hlimawm hle. Mipuiin min au phur a, Euro-ah pawh an chhunzawm ka beisei. Tute nge kan hmachhawn dawn tih hi ka hre châk a, draw neih hunah chuan TV aṭangin ka en ngei ang. Tuna kan team hian theihna sang tak kan nei a, nakkum nipuiah pawh nomawi chawi theih rinna lian tak ka nei a ni," tiin a sawi.

Italy coach Roberto Mancini chuan, "Zan duhawm tak a ni a, qualifying match hnuhnung bera khelh ṭhat hi a hlu. Record zawnga hlu ber chu nomawi a ni," tiin nomawi tel lo chuan record-in hlutna a neih loh thu a sawi a, Italian manager chuan qualifying round-a an chet ṭhat chu inelna takah pawh chhunzawm theih a beisei thu a sawi lang bawk.

Group J

Italy    9 - 1    Armenia

ITA : Ciro Immobile 8', 33'; Nicolo Zaniolo 9', 64'; Nicolo Barella 29'; Alessio Romagnoli 72'; Jorginho 75' (P); Riccardo Orsolini 77'; Federico Chiesa 81'

ARM : Edgar Babayan 79'

Greece    2 - 1    Finland

Liechtenstein    0 - 3    Bosnia-Herzegovina