A vawi sarih nan Arsenal an chak

Premier League season chawhnu a ni chho tawh a, Arsenal chuan season kal laia a vawi sarih nan hnehna an chang ve ta. Mikel Arteta enkawl team hian tun hma lama Gunners zia kha phawrh chhuak lehin Newcastle United 4-0 in an sawp.

Pathianni zan inkhel dangah Tottenham Hotspur chuan hun tawp dawna Son Heung-min goal hmangin Aston Villa 3-2 in an hneh hram, manager Jose Mourinho naute hian Champions League an sawi ngam tawh ang.

Emirates Stadium-a inkhelah hun chanve hma lamin Arsenal an hriam tawk lo, winger Nicolas Pepe-a freekick chu keeper Martin Dubravka-a'n nam chhuahsakin, defender Shkodran Mustafi khung tur chu goalline aṭangin forward Joelinton chuan a lo tauh chhuakhman bawk.

Second half-ah erawh Gunners an danglam hlak. Striker ni si, winger atana an chhawr Emerick Aubameyang-a'n Pepe cross tauh lutin a club hma a hruaipui - rawlthar duhawm Bukayo Saka chuan Valentino Lazaro kapkara ball a thunsak hnuah Pepe goal khung tur mawi zetin a siam.

Arsenal midfield thununtu leh inkhel cheimawitu ni bawk Mesut Ozil chuan hun tawp dawnah substitute Alexandre Lacazette ball pek a khung; Ozil-a'n goal a khung dawn hian player 11 zetin vawi 35 ball an inpek kual hnuah Germany international hlui hian a hmawr a bawk.

Gunners lamin an la duhtawk mai lo, hun tawp hma chiahin tun hnaia goal a khung theih loh vanga sawisel hlawh Lacazette chuan an goal lina a khung - a siamsaktu chu pound makatduai 72 man Pepe a ni. Ivory Coast international hian goal a khung bakah a ṭhiante vawi hnih a siamsak.

Arsenal manager Mikel Arteta chuan, "Team ṭha ho khelh angin kan khel ve thei dawn ṭan niin a lang, goal chhuah loh bakah goal li khungin hnehna kan chang thei hi a lawmawm takzet. A tir lam kha duhthusam lo mah se a tawpna erawh a lungawi thlak hle.

"A bik takin Alexandra Lacazette ka lawmpui, striker ni si a goal khung loh reng chu a hrehawm dawn. Tunah chuan inrintawkna a nei leh thei tawh ang, player leh staff zawng zawng pawhin thinlung takin an lawmpui hle tih a lang," a ti.

Newcastle boss Steve Bruce chuan, "Kan goal chhuah ho kha harsa vak loa dan theih an ni, darkar khat vel kha chu season tluana kan khelh ṭhat dan pangngaiin kan khel thei a, a hnu lam erawh kan zia kan hloh nasa hle," tiin a sawi.

EPL table-ah Newcastle hi 13-na niin point 31 an nei tawh, hnehna changtu Arsenal-in point 34 hmuin 10-na dinhmun an luah thung - North London lama an elpui Tottenham chu point rukin an phak lo mek.

Spurs an vannei

Son Heung-min-a'n penalty hlah mah se ball per let a khung a, South Korea international hian hun tawp hma chiaha goal khung lehin Tottenham hnehna a chanpui - penalty an chawi danah Aston Villa lam an lawm lo thungVilla Park-a inkhelah Toby Alderweireld-a'n anmahni lama a tih luh chu amah bawkin a sut. Tottenham lamin Son hmanga an hmahruaina chu Villa defender defender Bjorn Engels-a'n sut ve lehin, point insem tur anga an lan hnuah Son bawkin 2009 hnu lama Spurs chakna goal lut hnuhnung ber a khung.

Team pahnih te 1-1 a an inhnehtawk laiin Villa defender Bjorn Engels chuan box chhungah winger Steven Bergwijn a ti tlu, referee Martin Atkinson chuan foul nia ngai loin goal kick turin thutlukna a siam.

Mahse, VAR hmangin thil thleng ennawn a ni a, penalty pek a ni leh hnuhnawh! Aston Villa manager Dean Smith chuan, "Referee khan foul a ni lo tih a hria, a hmuna entu mipui 42,000 pawhin penalty turah an ngai lo," tiin VAR thutlukna a pawmpui loh thu a sawi.

Tottenham manager Jose Mourinho chuan, "Hnehna chan phu zawk kan ni, chutihrualin Villa khan point thum hmuh phu khawpin an khel chhuak ve tho," a ti. Mourinho hian penalty chu pek awm reng nia an inhriat thu a sawi ve thung.

UCL chungchang sawi zuiin Mourinho chuan, "Keini tan chauh a ni lo, kawng zau takin a inhawng mek. Arsenal, Everton, Sheffield United leh Wolves te pawhin an ban phak vek," tiin a sawi.

Aston Villa manager Dean Smith chuan, "Kan match hnuhnung pahnihah hun tawp dawna goal kan chhuah vangin point kan hloh. An ṭhatna lai tak counter attack hmanga min beihna hun kan siamsak ṭhin kha a pawi, zir belh tur kan la ngah hle," a ti.