Mangṭha Poch; Welcome back Mourinho!

May 8, 2019 a ni a, mittui nen khelmualah Mauricio Pochettino a ṭhingṭhi hnawk a, Argentine coach hian Tottenham Hotspur chu a vawi khat nan Champions League final-a hruai thleng a, lawm avanga mittui a dang zo lo. 

Ajax laka Spurs comeback ropui leh Poch lawm hmel kha theihnghilh mai atana uiawm khawpa football mawina pho chhuaktu a ni a, mahse kum em pawh a liam hmain chu hmun ropuia Spurs hlangkaitu Mauricio Pochettino chu a hna aṭangin ban a ni!

Ni e, i chhiar dik - Tottenham-in Poch an ban! Argentine coach thlak turin chanchin ngah Jose Mourinho lakluh zui a ni a, Chelsea boss a nih laia Spurs a enkawl ngai loh tur thu lo sawi tawhtu hian 2022-23 season thleng atan contract a ziak. 

Poch ngainatu Tottenham fan-te rilru na pawh a dam fel hmain Spurs chairman Daniel Levy chuan, "Khawvela manager hlawhtling ber pawl kan lalut a ni," tiin a sawi zui a, Premier League-ah Mourinho a lo kir leh ta - a ngaihnawm leh dawn. 

Mauricio Pochettino hian kum 2014 khan Tottenham a enkawl ṭan a, London club hi season nga a enkawl chhungin Premier League top four-ah vawi li a awmpui a, season liam taah Champions League final an lut bawk. Club langsar ni ngai lo kha Europe-a club hlauhawm pawlah a chhuah a, a hnathawh ropui avangin a chungah beiseina a san belh zel - Argentine coach hi a hnathawh ṭhat vekin a dinhmun a phehsak a, club lian nia inngai thar Spurs-in a chungah zahngaihna an lantir lo. 

Poch-a'n Spurs a enkawl hma zawng kha chuan Premier League season 22-ah vawi hnih chiah top four dinhmun an luah ve kha a ni a, top four 'regular' a dahtu kha beisei anga season a ṭan loh kumah pet chhuah a ni ta. 

Spurs chairman Daniel Levy chuan, "Harsa ti tak chungin thutlukna hi kan siam a, season hmasa tawp lam leh tun season ṭantira tualchhung football-a kan dinhmun hi lungawina khawp a tling tlat lo a ni," a ti. 

Poch-a'n Spurs a pan khan club pangngai tak ni mah se club langsar tia sawi tur erawh an ni lo a, Argentine coach hian a siam lian tih ngam a ni. Pound tluklehdingawn 1 man stadium saa transfer bazar-na tur an neih loh lai pawhin Poch-a'n a hawisan lo. 

Dawhthei taka nghaktu chet chhiat hun a thleng a, Spurs-in an tlin ve leh ta lo! Khawpui nula tlawng awl, pasal neih fuh zarzo ang maiin Spurs an leu vel a, Poch-a'n a tuam mawina chu an theihna avang emaw tiin 'a ṭha zawk' zawngin an hnuchhawn. 

Porto, Chelsea, Inter Milan leh Real Madrid-a lo hlawhtling tawh coach Mourinho lam an hawi vat a, Manchester United avangin hmingchhe deuh mah se top manager a la ni reng - kum khatah pound maktaduai 15 vel a hlawh dawn niin khawthlang media-te chuan an tarlang. 

Levy chuan, "Tawnhriat ropui tak a nei a, team chhungkuaa phurna a siam thei a, thluak ṭha tak a ni. Club-a enkawl apiangah hlawhtlinna a chhar a, he team-ah hian rinna leh beiseina a rawn luhpui kan ring a ni," a ti. 

Kum 2007 khan Spurs hian Mourinho hi an coach ni turin an lo sawm tawh a, March 2015 khan Portuguese manager chuan he thil thleng hi a lo sawi tawh - Chelsea fan-te a zah avanga London club a pan duh loh thu a sawi zui. 

Coaching hna nei loa rei tak a awm hnuin Mourinho-a'n Spurs a hnar reng thei lo a, a hmangaih hmasa Chelsea fan-te ngaihdan pawh ngaihtuah loin Spurs a pan ta. 

Mourinho chuan, "Spurs squad leh academy lama an player neih dan ka en a, anni nena thawhhona hun ka nei tur hian minti phur a ni," a ti. Hriat tel atana ṭha erawh Mourinho hi Porto a chhuahsan hnua a club pan apianga sum hmang nasa a ni a, sum hmang tlem ṭhang Spurs-ah engtinnge hma a lak dawn tih chu thil hriat châkawm a ni ta. 

Spurs hian Inrinni zan dar 6:00-ah London derby khel turin West Ham an lenchilh dawn a, Mourinho tan Tottenham coach a nih hnua a hna hmasa ber tur a ni ang. 

Tottenham leh Poch-a inkar hi tun hnaia khi ṭan chauh a ni lo a, season ṭantir aṭang khan Spurs manager hi a lungawi tawh lo. Poch hian, "Khelmual chhungah bak thu ka nei lo a, coach ka ni ber zawk," tiin transfer vela a inrawlh loh thu a sawi tawh. 

Premier League-ah hian an contract-a 'coach' tia title an pek chuan transfer-ah rawn ni ve mah se thutawp siamtu an ni lo a, manager an nih erawh chuan khelmual chhung leh transfer thlengin thutawp siamtu an ni thung. 

Poch-a contract-ah 'manager' tih ni mah se 'coach' nihna chu Argentine manager hian a keng ber zawkin a inhria a, thil awm lo a ni hran lo - tuna zawhna erawh khawiah nge a kal dawn? tih a ni. Kum 47 mi coach hi Bayern Munich, Real Madrid leh Manchester United nen sawizawm mek a ni a, thil chiang tak chu Spurs-in duh lo mah se an aia club lian zawk Poch neih duhtu an tam ang.