Rotterdam Open champion Monfils

Gael Monfils chuan rawlthar Felix Auger-Aliassime 6-2, 6-4 a hnehin Rotterdam Open nomawi a chawi, kar hmasa lawk khan Montpellier lamah hlawhtlinna a chan tawh bawk avangih ni sarih kar dan lekah title pahnih a la thei.

French tlangval Monfils hi kum 33 mi a ni tawh a, a khingpui Felix Auger-Aliassime erawh kum 19 mi chauh niin Rotterdam Open final khel thei naupang ber a ni thung. Inkhel boruak sangah tawnhriat nei tam zawk a dingchang.

Canadian rawlthar hian final lut turin set khat chauh a hloh, inrintawkna sang tak nen Monfils hmachhawn mah se tihsual a ngah - forehand hmang chauh pawhin unforced errors vawi 12 ngawt neiin a vuak sual vangin a khingpui point a pe hnem hle.

Monfils chuan, "Ka tan chuan chawlhkar nuam leh hlimawm bik a ni. Auger-Aliassime khan theihna a nei sangin hma a sawn hle, hma a sawn zel chuan helai hmun mai bakah inelna dangah pawh a la champion ang," a ti.