Tlai dar 4:00-ah Electric Veng Vs Chhinga Veng

Mizoram Premier League-ah round hnih chauh khelh tur a awm tawh a, semifinal khelh tum club-te bukin an awm chho mek. Vawiin tlai dar 4:00 hian inkhel pawimawh bik a awm dawn a, Electric Veng leh Chhinga Veng ten semifinal khel tur an zawng dawn.

Chhinga Veng FC hi round 14-a an hmachhawn tur Aizawl FC nen an inkhel tawh a, an chak loh avangin vawiin tlai inkhel hi an match hnuhnung ber a ni a, semifinal khelh an duh a nih chuan point hmuh chu an tih makmawh a ni.

Chhingcows coach Anand Gurung chuan, "Draw a tawk han tih chuan kan dinhmun a ṭhat hmel a, amaherawhchu draw game khelh hi a hlauhawm. Kan dam kim ṭha a, chak tumin kan khel ang," tiin Vanglaini a hrilh.

Chhinga Veng hian an coach hlui Lalsangzuala Hmar kaihhruai Electric Veng hi 2-1 in an hneh tawh a, tunah erawh an inkhelhna hi a pawimawh ber a ni tawh lo. Vawiin tlaia minute 90 an khelh tur hi team pahnih hmalam hun hril tur a ni dawn.

Electric Veng hi season liam ta khan match hnuhnung bera Mizoram Police an hneh loh avangin an tla a, tun ṭumah hian an kuta awm tawh hi an thlauh leh a nih chuan pawm harsa an ti ang. EFC hian an club kum 25 tlin kumah hian I Day Football nomawi an chawi tawh a, Mizoram inelna sang ber vawi hnih champion tawh coach awm chhun Sanga an lalut - semifinal thlen ngei an duh dawn.

Inkhelh hunin a zir loh avangin entu mipui tam a harsa dawn a, chutih rualin inkhel pawimawh dan a danglam loh avangin mipui hlut dan a la ngai reng. Player 12-na mipui thlenga an ṭan khawm a ṭul dawn a ni.