Ramhlun North an him dawn em?

Mizoram Premier League Season 8 aṭanga relegate tur a la hriat lo a, Ramhlun North-in an elpui ber Chawnpui FC ṭum hnih an hneh tawh chungin club dang laka result an neih ṭhat loh avangin an dinhmun a him lo.

Zanin dar 7:00 hian Ramhlun North-in Mizo player nei ṭha bera ngaih Mizoram Police an hmachhawn dawn a, RNFC hian point thum an hlawhchhuah theih chuan FC Venghnuai chungah an awm thei dawn. Mizoram Police erawh semifinal khel turin an tling tawh a, chutihrualin Lalbiaksanga Colney hote hian pahnihna nichunga semifinal khelh an duh avangin chak tumin an khel ang.

Team pahnih hi an inhmachhawn ṭumin Police-in 4-1 in hnehna an chang a, tun ṭumah BS-a Colney hote hi chak nawn tura ngaih ni mah se Ramhlun North dinhmunin a zir loh avangin result chiang sa a awm thei lo. Zanin hian inkhel hmuhnawm ber an lanchhuahtir thei lo a nih pawhin tla thei dinhmuna ding Chawnpui FC leh FC Venghnuai lamin result an ngaihven khawp ang.