James-a'n record ropui a siam

LeBron James chu NBA player zingah team zawng zawng laka triple-double nei thei hmasa ber a ni ta! James hian nimin zing khan Los Angeles Lakers chu Oklahoma City Thunder lakah 112-107 in hnehna a chanpui.

James hian point 25 a neih bakah - 11 rebounds leh 10 assists a nei a, basketball inelna sang berah hian vawi 86 zet triple-double a nei ta. James chuan, "A nihna takah chuan eng ang chiaha ropui nge a nih ka sawi thiam lo.

"Hnuhma ṭha tak chu a ni a, ka tan chuan a lawmawm takzet," a ti. Lakers hian season bul an ṭan fuh hle a, match 14 khelh tawhah vawi 12 ngawt hnehna an chang thei a ni.

Thawhlehni khan Luka Doncic chuan NBA regular season kal laiah mellung pawimawh a phun. Dallas Mavericks player hian San Antonio Spurs an hneh ṭumin 40-point triple-double a nei a, hetiang ti thei naupang ber a ni.

Kum 20 mi Dincic hian point 42 a neih bakah assist vawi 12 neiin rebounds vawi 11 a la bawk, a team hi Spurs lakah 117-110 in hnehna a chanpui.

Dallas Mavericks coach Rick Carlisle chuan, "Theihna nei sang bik a nih zia hi chu kan hria, hetianga ropui hian a khel chhuak fo thei ang tih pawh ka ring. Chutih rualin a khelh dan phung ṭhenkhatah zir tir tam tak a la nei," tiin a player chuan hmasawnna tur a la neih thu a sawi.

Inkhel dangah James Harden-a point 36 neih hmangin Houston Rockets chuan Portland Trail Blazers 132-108 in an hneh a, tun hnai an match hnuhnung pariatah Rockets hian hnehna an chang vek. Milwaukee Bucks tan Giannis Antetokounmpo bawk a hmuhnawm leh a, ani hian point 33 ngawt nei lehin a club hi Boston Celtics lakah 115-101 in a chak pui. Boston Celtics chuan Eastern Conference table hmahruaitu nih chhunzawm turin Phoenix Suns chu 99-85 in an hneh bawk.