Dillian Whyte a lo kir dawn

Heavyweight boxer thawm nei lian ve tak Dillian Whyte chuan December 7-ah ring chhung a rah leh tur thu a sawi a, kum 31 mi boxer hi Anthony Joshua leh Andy Ruiz inhmachhawn huna inlan ve tura ngaih a ni. Joshua leh Ruiz te hi Saudi Arabia-ah December 7 hian an inhnek dawn a, boxer rothap pahnih intawn hmaa inhnek hmasa lo awm tur zingah Whyte hi a inlan rin a ni - he thu buatsaih a nih lai hian a khingpui tur sawi chian a la awm lo. 

Whyte hian July khan a fight hnuhnung ber a hmachhawn a, Oscar Rivas chu point hmangin a hneh. Colombian boxer Rivas nena an inhnek hma hian thisen test-na lamah hman phal loh damdawi hmuh a ni a, mahse a hnuah inhnek thei tura tih niin British Boxing Board of Control (BBBofC) chuan an suspend lo bawk. 

Promoter lar Eddie Hearn chuan, "Ruiz-Joshua inhnek hmaa Whyte inlan tir tum a ni a, hmalakna kal mek a nih avangin engmah la chiang lo mah se a inhnek ngei chance a sang hle," tiin a sawi.