India tan beisei a bo tawh?

FIFA World Cup 2022 qualifier match nga an khelh tawhah India-in hnehna an la chang miah lo a, Thawhlehni zan khan an vawi hnih tlawmna ni turin Oman lakah 1-0 in an chak lo. 

India hian an match hmasa berah Oman hi an lo ngam tawh lo bawk a, Qatar, Afghanistan leh Bangladesh an inhnehtawkpui hnuah Oman bawk an ngam loh leh tak avangin beisei a bo tih ngam a ni. Blue Tigers hi an hmabak match thumah chak vek pawh ni se anmahni ang thoa match thum khelh tur la nei Qatar point hmuh zat (13) an hmuh theih tawh chuan loh avangin group hmahruaitu an ni thei tawh lo. 

Group-a pahnihna ti ṭha zual pali zinga tel chunga third round luh chu India tan beiseina la awm a ni a, mahse Oman-in point 12 an neih tawh sa avangin hei pawh India tan beisei loh a fuh zawkin a rinawm.

India coach Igor Stimac-a'n Afghanistan an inhnehtawkpui hnu lawkah team pumpui siksawi a hreh loh thu a sawi a, Croatian coach hian Oman lakah player pathum chiah a siksawi thung. 

Afghan team laka bul ṭan zingah Mandar Rao Desai, Pritam Kotal leh Sahal Samad te chu bench-ah dah vek an ni a, an aiah hian Nishu Kumar, Farukh Choudhary leh Manvir Singh luhtir an ni. Stimac hian left back duh thlan tur a nei chungin forward Ashique Kuruniyan chu left back-ah a khelhtir a, Bengaluru forward a dahna hian sawi a hlawh hle. 

Lallianzuala Chhangte chu match hmasaah squad-ah pawh telh a nih loh laiin Oman lakah erawh bench-ah ṭhuttir a ni a, Lunglei tlangval hian khelmual pawn lamah hun a hmang tluan. 

Player neih dan leh thawnthu hlui keu letin Oman hi chak tura rinkai zawk an ni a, chutihrualin team pahnih khelh ṭhat loh zanah referee duhsakna an dawn tel avangin 'vannei' tia sawi an phu zawk. Minute rukna lekah mualneitu team hian penalty an hlawh chhuak a, Rahul Bheke-a'n Muhsen Al Ghassani a tih tluk vang a ni - penalty tur niin lang lo mah se referee-in thutlukna a siam tawh a, thlak chi a ni lo. 

Mahse, penalty hlawh chhuaktu Muhsen Al Ghassani hian goal chung sang takah a penalty hlawhchhuah hi a thlawh a, India mualpho tur an vannei. Minute 33-naah Muhsen a vanduai tawh lo.  Mohsin Al Khaldi-a through ball ṭha zet chu goal-ah a chantir a, kum 22 mi striker hi a offside niin lang mah se assistant referee-in ban a phar miau loh avangin a goal.

India-in theihtawp chhuahin hnehna chan ngei tum mah se Stimac-a lu a hai belh a, Pronay Halder leh Adil Khan chu first half-ah hliam vangin lakchhuah an ṭul. Midfield laiah Brandon Fernandes han tal ve viau ṭhin mah se India-in chance an nei hleithei meuh lo a, inkhel hmuhnawm loh tak en chhungin minute 45 a liam. 

Second half-ah beiseina tlem neiin India rawn che ve deuh mah se Brandon-a cross ṭha tak chu Manvir Singh-a'n a tauh fuh thei lo a, FC Goa striker hi a la hriam tawk lo deuh a ni. Oman tana si ban nghaktu Ali Al-Habsi-a'n hnathawh tur a nei meuh lo a, West Brom goalkeeper hi eng ang taka thiam nge a nih Thawhlehni zanah chuan hrilh kan ni rih lo!

India coach Igor Stimac chuan, "Match nga kan khelh tawhah khan kan buaina ber chu goal khungtu kan nei lo kha a ni," tiin a sawi a, Croatian coach sawi hi a dikna a awm. Kum 35 mi Sunil Chhetri-a'n chuai lam a pan ve ṭan ta niin a lang a, Jeje Lalpekhlua a inhliam mek bawk avangin Blue Tigers hian tun dinhmunah striker rintlak sawi tur an nei lo.

Stimac chuan inzir mek an nih thu sawi nghalin, "Ka naute ka chhuang a, Oman hi team ṭha tak an nih avangin a harsa rih a ni. Inzir mek kan ni a, hmasawn zel kan tum ang, " a ti. Croatian coach chuan, "Pronay leh Adil inhliam a pawi a, mahse Oman pawh an inhliam ve tho. Keini buaina ni ta chu tackle theih kan neih chhunin min chhuahsan a ngai a, second ball-ah kan hlawhtling thei lo," a ti a, Pronay inhliam an tawrh thu a sawi.