Nadal awmna Spain an chak

Davis Cup Finals khelh laiah Rafael Nadal awmna Spain chuan Russia 2-1 a hnehin quarterfinal luh an beisei a, world number 1 Nadal-a chak bakah hian doubles huangah hnehna an chang bawk.

Thawhlehni zan match hmasa berah Andrey Rublev chuan Roberto Bautista-Agut chu 3-6, 6-3, 7-6 (0) a hnehin Russia hma a hruaipui a, mahse Spain tan Nadal-a'n Karen Khachanov chu 6-3, 7-6 (7) a hnehin ram pahnih hi 1-1 in an inhnehtawk.

Doubles hmangin chak zawk tur chinfel a ngai, Spain pair Marcel Granollers leh Feliciano Lopez te chuan Khachanov leh Rublev te ṭangdun chu 6-4, 7-6 (5) a hnehin a chungung zawkah an ṭang. Kum 33  mi Nadal chuan, "Kalphung thlak a ni a, match nga awm ṭhin kha pathum chauh a ni tawh. Match hmasa ber kan hloh phei chuan a hnu lamah inkhelh a harsat phah hle, chutihrualin inelna a ti ngaihnawm thung," tiin a sawi.

Inkhel dangah United States chu Canada lakah an chak lo, ram pahnih vawi 15 an intawn tawhah US hi an chak loh vawi khatna a ni. Canada tan hian Vasek Pospisil-a'n Reilly Opelka 7-6 (5), 7-6 (7) in a hneh a, Denis Shapovalov pawhin Taylor Fritz 7-6 (6), 6-3 in a hneh ve bawk - match hnih an chak tak avangin quarterfinal an lut.

ATP Finals lama hlawhtlinna an chan hnuah French duo Pierre-Hugues Herbert leh Nicolas Mahut te chuan Davis Cup lamah an ram an chakpui, singles lamah Jo-Wilfried Tsonga chuan hnehna chang bawkin Japan lakah 2-1 in an chak a ni.