Giggs-a enkawl Wales-in Euro 2020 khel dawn

Cardiff khawpuiah Thawhlehni zan khan Wales-in Hungary 2-0 in an hneh a, European Championship khel turin an tling. Ryan Giggs-a hoten hnehna an chan avangin group E inkhel danga Slovakia-in Azerbaijan 2-0 a an hnehna chu inkhel awmze nei lo a ni.

Wales tan Aaron Ramsey chu chhandamtu a ni a, Juventus midfielder hian Wales goal hnih a khung. Minute 15-naah  Gareth Bale cross chu Ramsey-a'n goal-ah a chantir a, Welsh mipui an sa hawk ṭan. Arsenal midfielder hlui hian minute 47-naah cool takin box chhungah ball a la thla a, goal kilah tak a pet lut.

Wales keeper Wayne Hennessey-a'n save ṭha bik a nei a, 1-0 a nih laiin ṭha zetin a dang. Chutihrualin Ramsey pawh hattrick siam thei dinhmunah a ding a, Hungary goalkeeper Peter Gulacsi-a'n a dan sak. Dragons tan tun hi inelna lian tham vawi thum an inpet tlinna chiah a ni a, 1958 World Cup quaterfinal lutin Euro 2016 khan semifinal an thleng leh bawk.