Bonucci-a'n contract pawt sei

Leonardo Bonucci chuan Juventus tan contract thar a ziak a, Italian champion tan hian kum 2024 June thla thleng a khelh chhunzawm ang - Turin club tan a hun tawp thleng a hmang dawn a nih hmel ta hle.

Kum 32 mi Bonucci hi a vawi hnih nan Juve tan a khel mek, 2017 khan AC Milan tan khel zuai mah se nikum khan Turin club-ah hian a kir leh a, rinrawl niin tunah chuan tlarhnunga an innghahna a ni. Bianconeri tan hian match 376 khel tawhin goal 17 a khung tawh a, Juve player zingah 2010-2011 season hnu lamah chuan inelna hrang hrangah ani aia inlan hnem an awm lo.

Season kal lai bikah pawh Juve tan minute 1440 a khel leh tawh, league leh European football lamah chuan minute zawng zawng a la khel kim vek a ni - ball pass a thiam bakah goal pawimawh a khung fo avangin club tan a pawimawhna a zual.

Italian champion hian Serie A lamah hma an hruai leh mek tawh a, tunah hian an keeper Wojciech Szczesny leh winger Juan Cuadrado te pawh hun rei zawk cham turin contract ziahpui an tum mek a ni.