PSG tana goal 100 khung thei Mbappe

Kylian Mbappe chuan Paris St-Germain tan goal 100 a khung tling ta a, a club hi Montpellier mualah 3-1 a hnehna chanpuiin Ligue 1 hmahruaitu an ni chhunzawm zel.

French Champion hian Thawhlehni zanah Istanbul Basaksehir nen Cham-pions League match pawimawh khelh hmabak an nei a, an thiampuipa Neymar chu hahchawlhna hun an pe - rawlthar duhawm Mbappe pawh bench lamah dah lailawk a ni.

Inrinni zan Ligue 1 inkhelah PSG tan Colin Dagba chuan Angel di Maria hnen aṭanga a ball hmuh a khung a, club tana a goal hmasa ber a ni. Montpellier tan Stephy Mavididi chuan sut ve lehin chawlhlawk laiin 1-1 in an inhnehtawk.

Inkhel chawhnu lamah team ṭha danglamna a lang. French champion hian Moise Kean hmanga hma an hruaina an khung bakah, substitute Mbappe chuan chak nemnghehna leh Paris club tana a goal 100-na ni bawk chu a khung.

Paris club tan hian Edinson Cavani (200), Zlatan Ibrahimovic (156), Pauleta (109) leh Dominique Rocheteau (100) te chuan mellung pawimawh hi an lo phun tawh a, goal 100 khung turin Mbappe hian match 137 chiah a mamawh.

Kum 21 mi Mbappe chuan, "Goal 100 khung chu thil ropui tak a ni, hetiang dinhmun thlen theih hi ka tan chuan duhthusam a ni. Goal hi mahni chauha khung theih a ni lo a, ka ṭhiante zara hetiang zat khung thei hi ka ni.

"Mimal sulhnu a pawimawh rualin kei chuan team-in result ṭha kan neih hi ka ngai pawimawh ṭhin. Tun season Ligue 1 kal laiah duhthusam tawk loa khelh chang kan ngah, tun ṭuma kan inkhel erawh a lungawi thlak viau," tiin a sawi.

France international hian PSG a zawm hmain AS Monaco tan goal 27 a lo khung tawh a, Ligue 1 nomawi a chawipui bakah Champions League semifinal a thlenpui hial. Paris club hian pound maktaduai 165 zet sengin Monaco aṭangin an lalut.