Barca an mualpho; Madrid khaw club an chak

Inrinni zan La Liga inkhelah Barcelona-in rin loh takin Cadiz chu 2-1 in an ngam lo a, an elpui Real Madrid leh Atletico Madrid-ten hnehna an chang ve ve thung. 

Cadiz tan Alvaro Gimenez leh Alvaro Negredo-ten goal khat ve ve an khung a, Barcelona tan Pedro Alcala (own goal) chuan a khungsak a, Barca player zingah goal khung an awm lo. 

Barcelona an tlawm avangin table-ah pasarihna an ni a, match 10 aṭangin point 14 chiah an la nei. Real chuan 1-0 in Sevilla an hneh thung a, Atletico-in 2-0 in Real Valladolid an hneh bawk. 

Real tana Vinicius Jr-a shot chu Sevilla goalkeeper Yassine Bounou chuan an lamah a ti lut a, Atletico tan Thomas Lemar leh Marcos Llorente chuan Valladolid lamah goal khat ve ve an khung thung. 

Barca-in inelna hrang hranga an match hnuhnung pasarihah vawi ruk chak an nei a, Ronald Koeman enkawlna hnuaiah an insiamṭha ṭan niin a lang. 

Mahse, Cadiz lakah thawnthu a danglam leh ta a, corner aṭanga ball kal chu Barca defender Oscar Mingueza chuan anmahni lamah hlauhawm takin a tauh a, Marc-Andre ter Stegen chuan a lo dang.

Mahse, German keeper ball dan per hi Gimenez chuan goal-ah a lo chantir. Catalan club-in minute 57-naah an si phurh an sut hram a, Jordi Alba ball cross tur chu Alcala chuan an lamah a ti lut. 

Barca lawm chhung erawh a rei lo. Point thum hawn an tum laiin minute 63-naah an defending chhiat an tuar a, Alba 'throw-in' aṭanga ball kal chu Clement Lenglet chuan a dang thei lo - hei hi Negredo chuan nang fuhin Ter Stegen a tlan hel hnuah goal-ah a chantir a, 2-1 in Cadiz an chak. 

Cadiz-in 1991 hnua a vawi khat nan La Liga-ah Barcelona an hneh a, kum 1991-a Cadiz-in Barca an hneh khan tuna Catalan club coach Koeman hi Barca player a ni!

Barca goal chhuah dan enin tlarhnung khelh fuh loh leh fimkhur tawk loh vang tih a lang a, Koeman-a'n insiamṭhat an mamawhna lai a hmu ang. 

Cadiz-in 18% lek ball chang chungin hnehna an chang a, mahse goal an khung tam zawk miau avangin kum 2006 hnua a vawi khat nan top flight league-ah mahni mualah an chak ve ta!

Barca-in vawi 21 ngawt shot an nei a, heng zinga 10 chu Lionel Messi-a shot a ni - keeper Jeremias Ledesma chuan Messi shot hi vawi nga zet a dang a, counter-attacking game mawi pholangtu Cadiz-in chak an phu. 

Real-in league match thum zet a zawna hnehna an chan zawh loh hnuin Sevilla an hneh ve leh ta a, tun hnaia result nei ṭha thei lo Zinedine Zidane a thaw huai ang. 

Goal awmchhun hi minute 55-naa lut a ni a, Vinicius-a shot chu Sevilla keeper Bounou chuan an lamah a ti lut a, kum 1991 hnua Sevilla keeper, mahni lama ti lut hmasa ber a ni. 

Sevilla tan Luuk de Jong, Lucas Ocampos leh Suso-ten an hun ṭha neih an khawhral avangin point an hlawh chhuak thei lo a, Karim Benzema leh Toni Kroos-ten Real tan chance an khawhral ve bawk. 

Atletico-in Lemar leh Llorente goal hmangin Valladolid chu 2-0 in an hneh thung a, league table chung berah pahnihna Real Sociedad aia match khata khel tlemin point hnihin hma an hruai fal.